Poıyzdar nege jıi keshigedi – «Jolaýshylar tasymaly» jaýaby

ASTANA. QazAqparat – «Jolaýshylar tasymaly» AQ bas dırektory Jánibek Taıjanov poıyzdardyń kestege sáıkes júrmeýiniń sebebin túsindirdi, dep habarlaıdy QazAqparat tilshisi.

«Poıyzdardyń keshigýi boıynsha buǵan deıin de birneshe ret resmı túsinik berildi. Jaz mezgilinde 3 saǵatqa, keıde 6 saǵatqa deıin keshigýler boldy», - dep jaýap berdi Jánibek Taıjanov BAQ ókilderiniń saýalyna.

Sondaı-aq, «Jolaýshylar tasymaly» keshigýdiń basty úsh sebebin atap ótti.

Birinshi sebep - jyl saıyn temirjoldarda jóndeý jumystary júrgiziledi. Maqsat – temirjol qatynasy qaýipsizdigin qamtý.

Ekinshi sebep – poıyzdardyń joldan shyǵyp ketýi. Osyǵan baılanysty poıyzdar keshigedi. Temirjoldy qalpyna keltirý belgili bir jumystardy atqarýdy qajet. Bul poıyzdardyń keshigýine alyp keledi.

Úshinshi sebep – klımattyq faktorlar. ıAǵnı, aýa raıy qolaısyzdyǵy, boran, qar taǵy sol sııaqty.

Onyń aıtýynsha, bıyl poıyzdar kidirisiniń basym bóligi magıstraldyq joldardar boıyndaǵy jumystarmen baılanysty.

Odan bólek, «Jolaýshylar tasymaly» AQ bas dırektory jolaýshylar poıyzdardyń keshigip kelgen árbir saǵaty úshin ótemaqy talap ete alatynyn eske saldy.

«Ár saǵat úshin jolaýshy bılet qunynyń 3% mólsherinde ótemaqy ala alady. Biz bul týraly vokzaldaǵy kassalarda aıtyp otyrmyz. Bul aqparat barlyq jerde bar», - dep tolyqtyrdy ol.

Buǵan deıin elimizde 654 eski vagon jolaýshy tasymaldap júrgeni týraly habarlaǵan edik.