Poıyzdar qozǵalysy qalpyna keltirildi

QYZYLORDA. QazAqparat - Qyzylorda oblysyndaǵy Qazaly-Sekseýil temirjol ýchaskesinde júk poıyzynyń quramy relsten shyǵyp ketti, dep habarlady QazAqparatqa «Qazaqstan temir joly» Ulttyq kompanııasy» AQ basqarma tóraǵasynyń kómekshisi Rýslan Imanqulov.

Budan buryn habarlanǵandaı, 12 qarashada saǵat 23:40 shamasynda Qyzylorda oblysy boıynsha  tótenshe jaǵdaı departamentiniń kezekshi qyzmetkerinen Qazaly-Aral baǵytyndaǵy Aral aýdanyna qarasty "Qamystybas-Shómish"  aýmaǵynyń 2426 shaqyrymynda PK-7 P-1273 júk poıyzy relsten shyqqany týraly habarlandyrý túsken. Keleńsiz jaǵdaıdyń sebep-saldary tekserilip jatyr. Qurban bolǵandar men zardap shekkender joq.

Shuǵyl túrde oqıǵa bolǵan jerge qalpyna keltirý poıyzy keldi, mamandar  brıgadasy jumys istep jatyr.

Qozǵalysty qalpyna keltirýge, poıyzdardy múmkindikke oraı barynsha keshiktirmeýge baılanysty barlyq sharalar qabyldandy.

Der kezinde atqarylǵan jumystardyń nátıjesinde qysqa merzimde - 5.51-de qozǵalys qalpyna keltirildi.

Jóndeý jumystaryna baılanysty tómendegi: №378 Mańǵyshlaq - Almaty; №481 Tashkent - Samara; №618 Astana - Kyzylorda jolaýshylar poıyzdaryn keshiktirýge týra keldi.