Poıyzda buzaqylyq jasaǵan jolserik abaqtydan shyqqan boıda jumysynan bosatylady - «Jolaýshylar tasymaly» AQ

ASTANA. QazAqparat - «Jolaýshylar tasymaly» AQ 2016 jylǵy 11 sáýirde «Almaty-Qostanaı» poıyzynda bolǵan oqıǵaǵa baılanysty jedel qyzmettik tekseris júrgizilgenin habarlady.

«Onyń nátıjesinde «Almaty-Qostanaı» poıyzynyń bastyǵyna qatań sógis jarııalandy. Poıyz jolserigi Qostanaı AІІB ýaqytsha ustaý abaqtysynan shyqqan boıda  buzaqylyǵy úshin jumystan bosatylady. Óz kezeginde «Jolaýshylar tasymaly» AQ osy qyzmetkerdiń buzaqylyq qylyqtary úshin jolaýshylardan keshirim suraıdy», - delingen habarlamada.

Budan buryn Kóliktegi ІІD baspasóz qyzmeti silteme jasalyp, 11 sáýirde túngi saǵat 01.55-te «Jolaýshylar tasymaly» AQ-nyń «Soltústik» óńirlik fılıalynyń 31 jastaǵy jolserigi «Almaty-Qostanaı» poıyzynda jumys ornynda bola tura, jolaýshylarǵa balaǵat sózder aıtyp, azamattardyń tynyshyn alǵany, toqtatý-kranyn julyp alǵany habarlanǵan bolatyn. Sonyń saldarynan poıyz 12 mınýt turyp qaldy.

Kólik polıtsııasy qyzmetkerleri jolserik ústinen QR ÁQtK 440-baby 1-bóligi, 560-baby 1-bóligi boıynsha ákimshilik hattama toltyrdy.  

Áýlıekól aýdandyq soty joǵaryda atalǵan jolserikke qatysty QRÁQtK 434-baby 1-bóligin (usaq buzaqylyq) buzǵany úshin 3 táýlikke qamaýǵa alý jóninde ákimshilik jaza qoldaný týraly qaýly shyǵardy.

Qazir quqyq buzýshy Qostanaı aýdandyq ІІB-niń ýaqytsha ustaý abaqtysynda qamaýda jatyr.