Poıyzda antısanıtarııany baıqaǵan jolaýshy tasymaldaýshyǵa shaǵymdana alady
«Árbir adam poıyzben jol júrgen shyǵar, biraq qolda bılettiń bolýy «A» pýnktinen «B» pýnktine deıin jol júrý quqyǵyn bildirip qana qoımaıtynyn árkim bile bermeıdi. Jolaýshynyń quqyqtary jetkilikti. Búkil sapar boıyna aqy tólengen ornyńyzda jaıly ornalasyp kelýge quqyǵyńyz bar. Biraq keıde temir joldyń qyzmet kórsetý personaly tarapynan qarapaıym jáne qajetti talaptardyń saqtalmaýynan poıyzda jol júrý quqyqtar buzylyp jatady. Árbir jolaýshy óz quqyqtaryn bilýi jáne qajet bolǵan jaǵdaıda qorǵaı bilýi qajet», - delingen taratylǵan habarlamada.
Máselen, jolaýshylar poıyzynyń ishinde ylǵaldy tazalyq jumystary táýligine eki retten kem emes, al dárethanalar lastanýyna qaraı táýligine keminde tórt ret júrgizilýi tıis. Kilem alashalar, jumsaq jıhazdar shańsorǵyshpen táýligine keminde eki ret shańnan tazartylady.
Poıyzdarda 6 saǵattan astam ýaqyt júretin jolaýshylar bılettiń qunyna kiretin tósek kerek-jaraqtarymen jáne tósek jabdyqtarymen qamtamasyz etiledi. Tósek jabdyqtary mindetti túrde plombalanǵan nemese kir jýý ornynyń mórtańbasy basylǵan, jınaqtaý kúni men jınaqtaýshy nómiri kórsetilgen tigilgen konvertte nemese pakette bolýy tıis. Tósek kerek-jaraqtaryn tósek jabdyqtarynsyz paıdalanýǵa, sondaı-aq óz tósek jabdyqtaryn paıdalanýǵa jol berilmeıdi.
«Eger siz poıyzdarda antısanıtarııany nemese joǵaryda kórsetilgen talaptardyń saqtalmaýyn baıqasańyz, batyl túrde tasymaldaýshyǵa júgine alasyz. Sondaı-aq jolaýshynyń qaýipsizdigine nemese densaýlyǵyna zalal keltirilgen jaǵdaıda jolaýshynyń tasymaldaýshyǵa narazylyq bildirýge quqyǵy bar. Bul rette narazylyqta jolaýshynyń ómiri men densaýlyǵyna keltirilgen zııandy óteý týraly talapty kórsetý, jolda júrý qujatynyń (bılettiń) túpnusqasyn jáne qajet bolǵan jaǵdaıda oqıǵa týraly aktini qosa berý qajet. Eger tasymaldaýshy atalǵan buzýshylyqtarǵa den qoımasa jáne ony joımasa, onda jolaýshy aýmaqtyq tutynýshylardyń quqyqtaryn qorǵaý departamentine júgine alady», - dep naqtylanǵan komıtettiń aqparatynda.