Poıyz bıletterin jappaı satyp alýdyń zańdy joldary ataldy

NUR-SULTAN. QazAqparat – Elimizde poıyz bıletterin zańdy túrde jappaı satyp alýǵa bolatyndyǵy aıtyldy. Bul týraly «Jolaýshylar tasymaly» AQ bas dırektorynyń orynbasary Vıktor Boshmann málim etti, dep habarlaıdy QazAqparat tilshisi.

«Halyq arasynda keń taralǵan «alypsatar» áreketin zańdy túrde iske asyrýdyń eki joly bar. Alǵashqy joly týrıstik agenttikter bılet satylymǵa shyqqan sátten bastap ózderiniń klıentteri úshin aldyn ala jappaı satyp ala alady. Eń bastysy satyp alynǵan bılettiń barlyǵynda ár adamnyń aty-jóni men JSN-i kórsetilýi tıis. Ekinshi zańdy joly keıbir týrıstik agenttikter jeke tasymaldaýshylardan poıyz bıletterin jappaı satyp alyp, sosyn ol bıletterdi óz klıentterine týrıstik qyzmetimen qosa usyna alady», - dedi V. Boshmann.

Odan bólek, dırektor orynbasary jolaýshylarǵa poıyz bıletterin «Qazaqstan temir joly» AQ-nyń resmı saıtynan satyp alýǵa keńes berdi.

«Eger bılet joq bolǵan jaǵdaıda, onda kútý bóliminen kezek alǵan durys. Sebebi jolaýshy óz bıletin qaıta ótkizgen jaǵdaıda sizge satylymǵa shyqqan bılet týraly habarlama keledi. Taǵy aıtyp ótetin jaıt, elektrondy bılet satý júıesi arqyly Qazaqstan boıynsha barlyq baǵyttaǵy poıyzdarǵa bılet satyp alýǵa bolady», - deıdi ol.

Aıta keteıik, buǵan deıin «Jolaýshylar tasymaly» AQ bas dırektorynyń orynbasary Vıktor Boshmann elimizde poıyz bıletterin alyp, qaıta satýshylardyń jolyn kesýdiń jańa tásilin atap kórsetken bolatyn.