Poıyz bıletiniń tapshylyǵy: Memorgandar úshin kúndelikti 1,5 myń bılet brondalady

ASTANA. QazAqparat - «Jolaýshylar tasymaly» AQ bas dırektorynyń orynbasary Danııar Nurmaǵambetov Memlekettik qyzmet isteri jáne sybaılas jemqorlyqqa qarsy is-qımyl agenttiginde ótken keńeste bılet tapshylyǵyn sheshý joldaryn usyndy, dep habarlaıdy QazAqparat tilshisi.

Kompanııa ókili kún saıyn 1 500 - 1 700 bılet kúshtik qurylymdar men memlekettik organdar úshin brondalatynyn aıtty.

«Bos bıletter kútpegen jerden qaıdan paıda bolady degen suraqtar bar. Kún saıyn QR aýmaǵyndardaǵy barlyq poıyzdarda 1 500-1 700 bılet kúshtik qurylymdar men memlekettik organdar úshin brondalady. Olar poıyzdyń júrýine eki saǵat qalǵanda bosatylady. Kóp jaǵdaıda bul bıletterdiń 80 protsenti qoldanylmaıdy. Sondyqtan, brondalǵan bıletter sanyn qysqartý bılet tapshylyǵy máselesin sheshýge edáýir kómekteser edi», - dedi «Jolaýshylar tasymaly» AQ bas dırektorynyń orynbasary Danııar Nurmaǵambetov Memlekettik qyzmet isteri jáne sybaılas jemqorlyqqa qarsy is-qımyl agenttiginde ótken keńeste.

Onyń aıtýynsha, QR Investıtsııalar jáne damý mınıstrligine birneshe ret júgingen. Ázirge, bul týraly arnaıy sheshim shyqpaǵandyqtan, brondalǵan bıletter sany ózgerissiz qalýda. 

Sonymen birge, Danııar Nurmaǵanbetov bılet alypsatarlaryna tosqaýyl qoıý úshin atqarylǵan sharalardy eske saldy.

«Bıletterdi qaıtarý tarıfin 1 000 teńge etip bekittik. Árıne, halyq tarapynan narazylyqtar boldy. Biraq, ókinishke oraı, bizde basqa amal joq. Ekinshiden, eger adam bıletti keri qaıtarýdy uıǵarsa, jeke óziniń nemese senimhat arqyly ótkizýin mindettedik. Buǵan deıin alypsatarlar jeke kýálik kóshirmesi arqyly bıletterdi ońaı almastyratyn. Atalǵan eki sharany engizý arqyly bıletti keri qaıtarý kórsetkishi 25 protsentke deıin azaıdy», - deıdi Danııar Nurmaǵanbetov.