Poıyzdarda ınternet jelisine qosylýǵa múmkindik beretin jańa qyzmet túri paıda boldy

<p>Jolaýshylarǵa qolaıly jaǵdaı jasaý úshin elimizdegi barlyq poıyzdarda aqparattyq júıelerge qol jetkizýge múmkindik beretin jańa qyzmet engizildi, dep habarlaıdy <a href="https://kaz.inform.kz/" target="_blank" rel="noopener">Kazinform</a> Kólik mınıstrligine silteme jasap.</p>

Vagondardaǵy Wi-Fi arqyly keń jolaqty ınternetpen qamtylmaıtyn aımaqta jolaýshy jeke elektrondy qurylǵysyn, uıaly telefony nemese planshetin qoldana otyryp, kórkem, derekti fılmder jáne mýltıplıkatsııalyq týyndylardy kóre alady ári mýzykalyq shyǵarmalardy tyńdaı alady. Atalǵan qyzmet túri jolaýshylarǵa tegin.

"Ol úshin jolaýshy óz qurylǵysynda Wi-Fi qosyp, sodan keıin tizimnen KTZ jelisin tańdaýy kerek. Ári qaraı braýzerdi ashyp, vputi.kz saıtyna ótýi qajet.

Sonymen qatar «Jolaýshylar tasymaly» AQ tarapynan «Transfermen jol júrý», «Perronnan úıge deıin», «Arnaıy avtobýs», «Turaqty shattl», «Býrabaı boıynsha transfer» sııaqty servıstik (ıntermodaldyq) qyzmet túrleri kórsetiledi", - delingen mınıstrlik jazbasynda.

«Transfermen jol júrý»

«Poıyz+poıyz» - yńǵaıly saıahat jáne jolaýshynyń ýaqytyn únemdeý úshin júıe saparǵa shyqqan adamnyń poıyzdan poıyzǵa aýysýy úshin qolaıly nusqalardyń birin tańdaıdy. Onlaın-servıs bilet.railways.kz saıtynda iske qosylǵan jáne bılet kassalarynda qoljetimdi. Búgingi tańda 7500-den astam bılet osy qyzmet túrin paıdalana otyryp resimdelgen.

«Perronnan úıge deıin»

«Poıyz+avtobýs» - jolaýshylardy «Nurly Jol» vokzalynan úıge tasymaldaý qyzmeti. Qazirgi ýaqytta qyzmetti «Almaty-Astana» jáne «Shymkent-Astana» baǵytynda qatynaıtyn poıyz jolaýshylary paıdalana alady. Keıin atalǵan qyzmet túrimen qamtý aımaǵy keńeıtiletin bolady.

«Arnaıy avtobýs»

«Poıyz+avtobýs» - poıyzdan avtobýsqa aýysyp, Astanadan soltústik aımaqtyń eldi mekenderine saparǵa shyqqan jolaýshylardy tasymaldaýǵa arnalǵan servıs.

«Turaqty shattl»

«Poıyz+avtobýs+ushaq» - «Nurly Jol vokzaly-aeroport-Qosshy áýejaıy» baǵyty boıynsha jolaýshylardy shaǵyn avtobýstarmen kúndelikti tasymaldaý servısi. Joba jolaýshylar aǵyny joǵary kezeńderde temirjol men avıatsııa kólik baılanysyn qamtamasyz etedi. Qyzmet quny 950 teńgeni quraıdy.

Turaqty shattl kúndelikti jóneltilip turady:

saǵat 08.30-da vokzaldan áýejaıǵa jáne Qosshy qalasyna;

saǵat 09.10-da áýejaıdan Qosshy qalasyna;

saǵat 16.30-da Qosshy qalasynan áýejaı men vokzalǵa deıin;

saǵat 17.10-da áýejaıdan vokzalǵa deıin.

Jolaýshylarǵa yńǵaıly bolý úshin atalǵan shattl vokzal aldyndaǵy alańda, áýejaıdaǵy avtoturaqta jáne Qosshy qalasyndaǵy «Áıgerim» saýda úıiniń mańaıynda kútedi.

«Býrabaı boıynsha transfer»

«Elektropoezd + elektroavto» - qyzmet Býrabaı kýrorttyq aımaqtary boıynsha №7507/7508 Astana-Kókshetaý, №6830/6829 Ereımentaý-Kókshetaý elektr poıyzdarymen qatynaıtyn jolaýshylardy tasymaldaýdy kózdeıdi.