Portýgalııada 5-ten 11 jasqa deıingi balalarǵa vaktsına egý josparlanyp otyr

LONDON. QazAqparat – Eýropadaǵy epıdemıologııalyq jaǵdaı kúrdeli. Ulybrıtanııada táýlik ishinde 58 myń vırýs juqtyrǵandar anyqtaldy. Koroldiktiń sanıtarlyq qyzmet ókilderi jeltoqsan aıynyń basynda-aq omıkron basymdyqqa ıe shtamǵa aınalýy múmkin degen boljam jasap otyr, dep habarlaıdy QazAqparat euronews.com saıtyna silteme jasap.

El bıliginiń habarlaýynsha, úshinshi vaktsına omıkrondy juqtyrý qaýpinen aıtarlyqtaı qorǵaıdy. Sondyqtan ony saldyrýǵa asyǵý kerek.

Portýgalııada 18-19 jeltoqsan aralyǵynda 5-ten 11 jasqa deıingi balalarǵa vaktsına egý josparlanyp otyr. Birinshi kezekte ol ózge de aýrýlary bar adamdarǵa egilmek. Koronavırýs ınfektsııasy taraı bastaǵaly 10 mln halqy bar Portýgalııada vırýs juqtyrǵan 1,18 mln adam tirkelip, 18,6 myń adam qaıtys bolǵan.

Germanııanyń densaýlyq saqtaý salasy aıtarlyqtaı qıyndyqtardy bastan ótkerip otyr. Eldegi iri aýrýhanalardyń biri sanalatyn Mıýnhen aýrýhanasyndaǵy oryndardyń tórtten úshinde koronavırýs juqtyrǵan naýqastar jatyr.

Bas dárigerdiń sózinshe, vaktsına saldyrǵan adamdar sany kóp bolsa, jaǵdaı búgingiden áldeqaıda ońdy bolar edi. Jumy kúni el Parlamenti birqatar kásip ıelerin mindetti vaktsınalaý týraly zań jobasyn maquldady. Vaktsına alýy mindetti kásip ıeleriniń tiziminde aýrýhanalar men qarttar úıiniń qyzmetkerleri bar.