Polıtsııa men bank qyzmetkeri Qaraǵandy turǵynynyń 3 mln teńgesin alaıaqtardan saqtap qaldy

<p>ASTANA. KAZINFORM - 60 jastaǵy Qaraǵandy qalasynyń turǵyny 3 mıllıon teńge aqshasyn ınternet-alaıaqtardan aman saqtap qalǵany úshin polıtsııa men bank qyzmetkerlerine rızashylyǵyn bildirdi.</p>

Ol áıel qazirgi ýaqytta beleń alǵan ınterten-alaıaqtyq týraly jaqsy biledi, alaıda qala turǵyny olardyń quryǵyna túsemin dep múldem oılamaǵan.

– Maǵan WhatsApp jelisinde mekeme basshysynyń tapsyrmasy boıynsha quqyq qorǵaý organdary qarjylyq zań buzýshylyqtardyń aldyn alý úshin qyzmetkerlerimizdiń esepshotyn tekserip jatyr degen habarlama keldi. Arada on bes mınýt ótken soń telefonyma belgisiz bireý qońyraý shalyp, ózin quqyq qorǵaý organynyń qyzmetkerimin dep tanystyryp, meniń esep-shotym arqyly esirtki qylmysynan túsken aqsha ótip jatqanyn aıtty. Ol meniń jeke sáıkestendirý nómirimdi eshkimge bermeý týraly surady. Osydan keıin maǵan basqa bir adam qońyraý soǵyp, ózin bank qyzmetkerimin dep tanystyryp, meniń atyma segiz nesıe rásimdelgenin aıtty. Sóıtip ol maǵan basqa bankten nesıe alyp, jınalǵan qaryzdy jabýǵa keńes berdi. Alaıda birinshi jáne ekinshi ret qońyraý soqqan adamdar meniń jasap jatqan áreketimdi eshkimge aıtpaýǵa keńes berdi. Osydan keıin olar telefon arqyly meniń árbir basqan qadamym boıynsha nusqaý berip otyrdy. Men qaladaǵy bankterdiń birine baryp, 3 mıllıon teńge nesıe rásimdep, ony qolma qol aqshamen alyp kettim. Sodan keıin olar basqa bankke baryp, maǵan WhatsApp jelisine jiberilgen esep-shotqa aldynda alǵan aqshany jiberýdi talap etti. Sol jerge barǵanda bank operatorynyń jiberilgen esep-shottyń shetelde tirkelgenin aıtqannan keıin mende kúdik týdy. Sol kezde maǵan banktiń bólim bastyǵy kelip bolyp jatqan jaǵdaıdy aıtýyn surap, men barlyq áreketimdi aıtyp berdim. Keıin ol polıtsııa qyzmetkerlerin shaqyrdy, – dedi qaraǵandylyq turǵyn.

Bankke kelgen oblystyq polıtsııa departamenti krımınaldyq polıtsııa basqarmasyna qarasty kıberqylmysqa qarsy kúres bóliminiń qyzmetkerleri oqıǵanyń jaı-japsaryn zerdelegen soń, azamatshanyń bankten alǵan nesıesin jáne esep-shottaryn qaıtadan japqyzyp, qala turǵynyn alaıaqtardyń arbaýynan aman alyp qaldy.

Qaraǵandy oblysy polıtsııa departamenti qala turǵyndarynan bank nemese quqyq qorǵaý organynan dep belgisiz adamdar qońyraý shalsa, birden telefon tutqasyn qoıyp, polıtsııaǵa habarlasýdy suraıdy.