Polıtsııa qandaı jaǵdaıda qyzmettik qarýdy qoldana alady

<p>ASTANA. KAZINFORM &ndash; QR Іshki ister mınıstrligi polıtseıler qaı jaǵdaıda qyzmettik qarýdy qoldanatynyn túsindirdi.</p>

«Quqyq qorǵaý qyzmeti týraly» Zańnyń 61-babyna sáıkes, qyzmetkerler atys qarýyn jáne ózge de qarýdy jeke adamdardyń ómiri men densaýlyǵyna qater tóngen jaǵdaıda olardy qylmyskerden qorǵaý, sol sııaqty kepilge alynǵandardy bosatý kezinde, sondaı-aq qyzmetkerlerge jáne olardyń otbasy múshelerine, qoǵamdyq tártipti qorǵaý, qoǵamdyq qaýipsizdikti qamtamasyz etý jáne qylmystylyqqa qarsy is-qımyl jasaý jónindegi qyzmettik nemese qoǵamdyq boryshyn atqaryp júrgen adamdarǵa jasalǵan shabýylǵa toıtarys berý jaǵdaıynda qoldanady», - delingen mınıstrliktiń Kazinform agenttigine bergen jaýabynda.

Munymen qosa, qyzmetkerler atys qarýyn jáne ózge de qarýdy:

- jeke adamdardyń turǵyn úı-jaılaryna, quqyq qorǵaý organdary kúzetetin obektilerge, memlekettik uıymdardyń úı-jaılaryna jasalǵan shabýylǵa toıtarys berý, qyzmettik nemese áskerı narıadqa jasalǵan shabýylǵa toıtarys berý;

- quqyq qorǵaý organynyń atys qarýyn jáne ózge de qarýdy, arnaıy kólik quralyn tartyp alý áreketteriniń jolyn kesý;

- qarsylyq kórsetetin nemese qylmys jasaý kezinde ústinen túsken, qamaýdan qashqan adamdardy (ákimshilik qamaqta ustalatyndardan basqa) ustaý, qarýlanǵan adamdardy ustaý;

- eger kólik júrgizýshi qyzmetkerdiń zańdy talaptaryna baǵynbasa jáne jeke adamdardyń ómiri men densaýlyǵyna qater tóndirse, kólik quraldaryna aqaý keltirý arqyly olardy toqtatý;

- qarý qoldaný nıeti týraly azamattarǵa eskertý, dabyl sıgnalyn berý nemese kómekke shaqyrý úshin qoldanýǵa quqyǵy bar.

Sonymen qatar, qyzmettik qarýdy polıtsııa qyzmetkerleri barlyq basqa da qajet qorǵanys jaǵdaılarynda qoldana alady.