Polıtsııa bir kúnde jalǵan terrorızmniń úsh faktisin ashty

<p>ASTANA. KAZINFORM &ndash; Mańǵystaý oblysy polıtsııa departamentiniń jedel basqarý ortalyǵyna sý tasqyny aımaǵynan evakýatsııalanǵan Qulsary qalasynyń turǵyndaryn qonaq úılerdiń birinde qarýly adamdar kepilge alyp, aqshalaı syıaqy talap etýde degen qońyraý tústi.</p>

Tekserý barysynda bul aqparat jalǵan bolyp shyqty. Oblystyq PD ekstremızmge qarsy is-qımyl basqarmasynyń qyzmetkerleri qabyldaǵan sharalar nátıjesinde Beıneý kentinde jalǵan qońyraý shalǵany úshin 22 jastaǵy qyz ustaldy.

Sonymen qatar onyń buǵan deıin avtobýsta uıaly telefon urlaǵany anyqtaldy. Qoldy bolǵan gadjetten ol qońyraý shalǵan.

Qazirgi ýaqytta kúdiktige qatysty bóten múlikti urlaý jáne terrorızm aktisi týraly kórineý jalǵan habarlaý faktileri boıynsha sotqa deıingi tergeý júrgizilip jatyr.

Sol kúni Aqtóbe qalasynyń polıtsııasyna er adam uıaly telefonnan qońyraý shalyp, Grıshın kóshesindegi úıde bomba ornatylǵany týraly aıtqan. Bul fakt te rastalmady.

Aqtóbe oblysy PD ekstremızmge qarsy is-qımyl basqarmasynyń qyzmetkerleri buryn da osyndaı qylmys úshin sottalǵan Aqtóbe qalasynyń jumys istemeıtin turǵynyn mas kúıinde ustady. Oǵan qatysty terrorızm aktisi týraly kórineý jalǵan habarlaǵany úshin qylmystyq is qozǵaldy.

Jalǵan terrorızmniń úshinshi faktisi Almaty qalasynda tirkeldi. Onda qalanyń jeke kompanııalarynyń biriniń telefonyna WhatsApp messendjeri arqyly iri aqshalaı syıaqy úshin saýda ortalyǵyna bomba qoıý týraly usynys kelip tústi.

Jedel-izdestirý is-sharalaryn ótkizý barysynda Jetisý oblysy PD EQІQB qyzmetkerleri Taldyqorǵan qalasynyń 9 jasar turǵynyn anyqtady. Ol ınternet jelisinde kompanııanyń jarnamasyn kórip, buzaqylyq nıetpen osy habarlamany joldaǵany anyqtaldy.

Kámeletke tolmaǵan balanyń ata-anasy balany tárbıeleý sharalaryn qabyldamaǵany úshin ákimshilik jaýapkershilikke tartyldy.

ІІM Qylmystyq kodekstegi osy qylmys úshin 5 myń AEK (bul 18 mln teńgeden astam) mólsherinde aıyppul ne bolmasa bes jylǵa deıin bas bostandyǵyn shekteý nemese bas bostandyǵynan aıyrý kózdeletinin taǵy da eske salady.

Sondaı-aq sot sheshimi boıynsha kináli adam jalǵan terrorızm aktisi saldarynan jeke jáne zańdy tulǵalarǵa keltirilgen zalaldy óteýge tıis.