Polıtseıler spýtnıktiń kómegimen qarasora ósetin alqaptardy anyqtaýda

<p>&laquo;Qarasora&raquo; respýblıkalyq jedel-profılaktıkalyq is-sharasy barysynda zańsyz aınalymnan 32 tonna esirtki tárkilendi, dep habarlaıdy <a href="https://kaz.inform.kz/lenta/" target="_blank" rel="noopener">QazAqparat </a>tilshisi.</p>

«Jyl saıyn maýsym-qazan aılary aralyǵynda jabaıy qarasoranyń ósip-jetilýi kezeńinde Іshki ister mınıstrligi «Qarasora» respýblıkalyq jedel-profılaktıkalyq is-sharasyn ótkizedi. 1 maýsymnan beri atalǵan shara barysynda 820 esirtki qylmysy anyqtaldy. 6 uıymdasqan qylmystyq toptyń áreketi toqtatylyp, olardyń jetekshileri men 54 qatysýshysy qylmystyq jaýapkershilikke tartyldy», - dedi Іshki ister mınıstrliginiń ókili Shuǵyla Turlybek baspasóz máslıhatynda.

ІІM málimetinshe, zańsyz aınalymnan 32 tonna esirtki tárkilendi. Onyń ishinde 5,3 tonnaǵa jýyq marıhýana, 476 kelige jýyq gashısh, 241 keliden astam «sıntetıka» jáne 62 keliden astam geroın.

«Qyzylorda, Túrkistan jáne Ulytaý oblystarynda qarasora ósirilgen 65 plantatsııa anyqtaldy. Olardyń jalpy aýmaǵy 10 gektardan asty. Bul rette salmaǵy 20 tonnadan asatyn 70 myńnan astam qarasora butalary tárkilenip, joıyldy. Mundaı esirtki ósimdikterin anyqtaý úshin polıtseıler Ulttyq ulannyń tikushaqtaryn paıdalanyp, «Búrkit» arnaıy jasaǵynyń qyzmetkerlerin jumyldyrdy. Qyzylorda, Aqtóbe, Túrkistan jáne Ulytaý oblystarynyń aýmaǵynda 150 myń sharshy shaqyrymnan astam jer tekserildi. Jalpy 70 ret áýeden barlaý júrgizildi», - deıdi ol.

Mınıstrlikten habarlaǵandaı, esirtki ósetin jerlerdi anyqtaý úshin «Qazaqstan Ǵarysh sapary» AQ ǵaryshtyq spýtnıkteri arqyly jer beti qashyqtyqtan tekserilip, nátıjesinde yqtımal esirtki plantatsııalarynyń 60 geografııalyq koordınaty polıtsııaǵa berilgen. Qazir olarǵa qatysty tergeý amaldary júrgizilip jatyr.