Polıtsııanyń servıstik modeli: Qazaqstan qaı elderdiń tájirıbesin aldy

NUR-SULTAN. QazAqparat – QR ІІM Ákimshilik polıtsııa komıteti tóraǵasynyń orynbasary Alekseı Mılıýk Qazaqstanda qoǵamdyq qaýipsizdikti qamtamasyz etýdiń servıstik modelin engizýde qaı elderdiń tájirıbesi paıdalanylǵanyn aıtyp berdi, dep habarlaıdy QazAqparat.

«Qoǵamdyq qaýipsizdikti qamtamasyz etýdiń servıstik modeline kóshý qazaqstandyq polıtsııany reformalaýdyń mańyzdy kezeńi bolyp tabylady. Osy maqsatta mınıstrlik jetekshi álemdik tájirıbe men servıstik model elementterin engizý kezeńderin zerttedi», - dedi Alekseı Mılıýk QR ІІM uıymdastyratyn aptalyq brıfıngte.

Onyń aıtýynsha, Ulybrıtanııa polıtsııa jumysyn dástúrliden servıstik qyzmetke aýystyrǵan alǵashqy elderdiń biri atandy. Biraq oǵan 15 jyldan astam ýaqyt qajet boldy.

«Grýzııanyń da tájirıbesi qaraldy, olar 2005 jyly polıtsııaǵa túbegeıli reforma júrgizgen. Grýzın reformasy halyqtyń polıtsııaǵa degen senim deńgeıin arttyryp, oń nátıje berdi. 2012 jyly ol 90% quraǵan», – dedi Alekseı Mılıýk.

Sonymen birge, spıker sheteldik tájirıbeden basqa jurtshylyq pen otandyq sarapshylardyń jáne polıtsııa qyzmetkerleriniń pikirleri men usynystary eskerilgenin atap ótti.

«Aldyn ala jumystar otandyq servıstik modeldi damytýdyń negizgi tásilderin ázirleýge múmkindik berdi. Olardy synaqtan ótkizý úshin 2020 jyldyń sońynan bastap birqatar óńirlerde pılottyq jobalar júıeli túrde iske qosyldy. Qazir Memleket basshysynyń taıaýdaǵy Qazaqstan halqyna Joldaýynda aıtylǵan tapsyrmalaryn oryndaý úshin osy jumysqa jergilikti bılik organdaryn keńinen tarttyq jáne olardy taratý boıynsha sharalar qabyldap jatyrmyz», - dedi Alekseı Mılıýk.

Aıta keteıik, 2023 jyly polıtsııa jáne prokýratýra organdarynda jumystyń «servıstik» modeli engiziledi. 2024 jyly memleket kepildik beretin quqyqtyq kómektiń kólemi 2 esege artady.