Polıtsııanyń qyzmettik ıtteri erekshe balalardy emdeýge qoldanyla bastady

NUR-SULTAN. QazAqparat – Qazaqstanda qyzmettik polıtsııa ıtteri erekshe balalardy emdeý úshin qoldanyla bastady. Bul týraly QR Іshki ister mınıstrliginiń resmı ókili Nurdildá Oraz aıtyp berdi, dep habarlaıdy QazAqparat.

«Erekshe balalar úshin ıtter eń jaqsy dos bolatynyn kópshilik bile bermeıdi. Olarǵa basqa balalarmen sóılesý qıyn. Osyndaıda balalardy tez baýrap alatyn ıtter kómekke keledi. Bala men ıt bir-birin jaqsy túsinedi. Sondyqtan QR ІІM Almaty qalasyndaǵy Kınologııalyq ortalyǵy arnaıy túzetý mektep-ınternatynyń balalaryn qonaqqa shaqyrdy», - dedi Nurdildá Oraz Іshki ister mınıstrligi uıymdastyratyn aptalyq brıfıngide.

Resmı ókildiń aıtýynsha, balalar qyzmettik ıttermen tanysyp, olardyń kórsetilimderine qatysty, tórt aıaqty polıtsııa kómekshilerin basqarýdy jáne komandalar berýdi úırendi. Mundaı kezdesýler úshin polıtsııa ıtteri arnaıy balalarmen qarym-qatynas ádisterin úırengen.

«Olar qımyldardy, sóıleý ıntonatsııasyn óte jaqsy sezinedi jáne durys túsinedi. Arnaıy daıyndalǵan ıtter psıhıkalyq jáne júıke kerneýin jeńildetedi, belgili bir áleýmettik jáne kommýnıkatıvti minez-qulyqty damytýǵa kómektesedi. Árbir erekshe bala eresek ıtpen tanysýǵa, kúshiktermen sóılesýge, olardy tamaqtandyrýǵa jáne oınaýǵa múmkindik aldy», - dedi Nurdildá Oraz.

Aıta keteıik, jyl basynan beri polıtseıler qyzmettik ıtterdiń kómegimen 4 myńnan astam qylmysty ashty jáne zańsyz aınalymnan bir tonnadan astam túrli esirtki zattaryn alýǵa kómektesti.