Polıtsııa shymkenttikterdi 60 mln teńgege san soqtyryp ketken alaıaq áıelge izdeý jarııalady
11:50, 14 Shilde 2023
ASTANA. QazAqparat - Shymkenttikterdi 60 mln teńgege aldady dep kúdik keltirilip otyrǵan áıelge izdeý jarııalandy, dep habarlaıdy QazAqparat Polisia.kz saıtyna silteme jasap.
Myńbaeva Azıza Mamytqyzy 1963 jyly týǵan. QR QK-niń 190-babynyń 4-bóligi «Asa iri mólsherde jasalǵan alaıaqtyq» boıynsha kúdikke ilindi.
Ol 5 azamatty 60 mln teńgege aldap soqqan. Ol jábirlenýshilerden jyljymaıtyn múlik qunynyń 10-15 paıyzyn tólep, senimhat jazyp berýge kóndirip, qalǵan somany jaqyn arada tóleýge ýáde bergen. Qajetti qujatty alǵannan keıin, ol basqa bireýdiń múlkin qaıta satyp júrgen.
Qazirgi ýaqytta áıel tergeý organdarynan jasyrynyp júr. Aıta keteıik, ol buryn da izdeýde bolǵan.