Polıtsııa Shymbulaqta bolǵan janjalǵa qatysty túsinikteme berdi

ALMATY. QazAqparat – «Shymbulaq» dırektory Rınat Ábdirahmanov Instagram-daǵy paraqshasynda taý shańǵy kýrorty aýmaǵynda tóbeles bolǵany týraly jazdy. Bul oqıǵaǵa qatysty Almaty polıtsııasy túsinikteme berdi dep habarlaıdy QazAqparat tilshisi.

«Er adam dóreki túrde kabınaǵa basqa qonaqtyń kirýine ruqsat bermedi. Qyzmetker qonaqty kabınaǵa otyrǵyzýǵa tyrysqanda, er adam esikti jaýyp qana qoımaı, ony uryp jiberdi», - dep jazdy «Shymbulaq» taý shańǵysy kýrortynyń dırektory Rınat Ábdirahmanov.

Almaty qalalyq polıtsııa departamentiniń málimetinshe, «Shymbulaq» qyzmetkeriniń aryzy 12 tamyz kúni tústi.

«Bul fakt QR Qylmystyq kodeksiniń 293-baby, 1-bóligi boıynsha sotqa deıingi tergeýdiń biryńǵaı tiziliminde tirkeldi. Kúdikti men istiń basqa da mán -jaılary anyqtalyp jatyr. Atalǵan derek boıynsha QR zańnamasyna sáıkes shara qoldanylady», - dedi Almaty qalalyq Polıtsııa departamentiniń bastyǵy Qanat Taımerdenov.