Polıtsııa saılaý ýchaskesinen shyǵarǵandardyń sany 32-ge jetti

ASTANA. QazAqparat – Іshki ister mınıstrligi Ákimshilik polıtsııa komıtetiniń tóraǵasy Qaısar Sultanbaev Qazaqstan telearnasy ótkizip jatqan onlaın telemarafonda polıtsııa saılaý ýchaskesinen shyǵarǵandardyń sany 32-ge jetkenin málim etti, dep habarlaıdy QazAqparat tilshisi.

«Jalpy, qazirgi ýaqytta eldegi jáne saılaý ýchaskelerindegi ahýal turaqty. Komıssııa tóraǵalarynyń aktileri boıynsha der kezinde sheshilgen eleýsiz oqıǵalar oryn alýda. Saılaý ýchaskelerinen barlyǵy 32 azamat shyǵaryldy. Quqyq buzýshylyqtardyń negizgi sebepteri – saılaý komıssııalarynyń jumysyna kedergi jasaý, ýchaskede beınetúsirilim júrgizý, komıssııa múshelerine dóreki minez-qulyq kórsetý bolyp tabyldy», - dedi komıtet basshysy.

Onyń málimeti boıynsha, Almaty, Jetisý jáne Shyǵys Qazaqstan oblystarynda bıýlletenderdi búldirýdiń úsh deregi tirkelgen.

«Saılaý ýchasesine mas kúıinde kelip, qoǵamdyq tártipti buzýdyń 4 faktisi oryn aldy. Olar Almaty, Shyǵys Qazaqstan, Ulytaý oblystary boıynsha. Quqyq buzýshylar kýálandyryldy jáne olarǵa Ákimshilik quqyq buzý kodeksiniń 444-babymen jáne 434-babymen ákimshilik hattamalar toltyryldy. Polıtsııa qyzmetkerleri shtattyq rejımde qyzmet atqarýdy jalǵastyrýda. 506 jabyq saılaý ýchaskesiniń 4333-inde daýys berý aıaqtaldy», - dedi Qaısar Sultanbaev.