Polıtsııa habar-osharsyz ketken Qostanaı oblysy turǵynynyń denesin tapty

ASTANA. QazAqparat – Polıtsııa habar-osharsyz ketken Qostanaı oblysy turǵynynyń denesin tapty, dep habarlaıdy QazAqparat Polisia.kz saıtyna silteme jasap.

58 jastaǵy áıel 30 maýsymda úıinen shyǵyp ketken. Onyń joǵalyp ketkeni týraly aryzdy polıtsııaǵa aǵasy joldaǵan. Polıtsııa qyzmetkerleri, Qostanaı oblysy boıynsha Tótenshe jaǵdaılar departamenti, Ulttyq qaýipsizdik qyzmetiniń shekara qyzmeti jáne eriktilermen birlesip, dereý izdeýge kiristi.

Jedel-izdestirý is-sharalary barysynda asa aýyr qylmys jasaǵanyn moıyndaǵan kúdikti ustaldy. Tergeý áreketterin júrgizý kezinde ol joǵalǵan áıeldiń máıitiniń jerlengen jerin kórsetti.

QR QK-niń 99-baby «Kisi óltirý» boıynsha sotqa deıingi tergeý bastaldy, qajetti saraptamalar taǵaıyndaldy. QR QІJK-niń 201-baby tártibindegi basqa aqparat jarııa etilmeıdi.