Polıtsııa departamentterinen urlaǵan 1,5 myń qarý-jaraqtyń 967-si tabyldy
20:17, 07 Aqpan 2022
NUR-SULTAN. QazAqparat – Qyzmetkerler eshqandaı qarsylyq kórsetpesten Almaty jáne Jambyl oblystarynyń Polıtsııa departamentteriniń ǵımarattaryn qarý-jaraq, oq-dárimen birge tastap ketken. Bul týraly QR Bas prokýratýrasy Arnaıy prokýrorlar qyzmetiniń bastyǵy Rızabek Ojarov aıtty, dep habarlaıdy QazAqparat tilshisi.
«Ókinishke oraı, memlekettiń jáne qoǵam qaýipsizdiginiń múddesine qaıshy is-áreket oryn aldy. Qyzmetkerler eshqandaı qarsylyq kórsetpesten Almaty jáne Jambyl oblystarynyń Polıtsııa departamentteriniń ǵımarattaryn qarý-jaraq, oq-dárimen birge tastap ketken»,- dedi Rızabek Ojarov Ortalyq kommýnıkatsııalar qyzmetindegi brıfıng barysynda.
Onyń atap ótýinshe, osynyń saldarynan búlikshiler 1,5 myńnan astam úlken arsenalǵa ıe bolǵan.
«Olardyń ishinde granatomet, pýlemet, avtomat, tapanshalar men granatalar bar. Munyń barlyǵy – ańshylyq dúkenderden urlanǵan qarýlardy eseptemegende. Ázirge 967 dana qarý tabyldy, qalǵandarynyń qaıda ekeni áli de belgisiz. Polıtsııa olardy izdeýde», - dedi Bas prokýratýra ókili.