Polıtsııa aqtóbeliktiń kóligi men úıinen 7 kelige jýyq marıhýana tárkiledi
Aqtóbe oblystyq PD Esirtki qylmysyna qarsy is-qımyl basqarmasynyń qyzmetkerleri arnaıy jasaq sarbazdarymen «Dármek» jedel - aldyn alý is-sharasyn ótkizdi. Aqtóbe qalasy Ábilqaıyr han dańǵyly boıynda 44 jastaǵy aqtóbeliktiń basqarýyndaǵy «Toyota Camry» avtokóligin toqtatty. Tekserý barysynda avtokólikten ósimdik tektes zattary bar 33 polıetılen oramasy salynǵan dorba tárkilendi. Saraptama qorytyndysyna sáıkes, tárkilengen zat salmaǵy shamamen 1,5 keli marıhýana bolyp shyqty.
«Brýno» atty qyzmettik-izdestirý ıt kómegimen jaldamaly páterde tintý júrgizildi. Munda salmaǵy 5 keliden asatyn marıhýana tabyldy. Bári 84 polıetılen paketine oralǵan. Alynǵan esirtki zattarynyń jalpy salmaǵy 6,8 keli. Bul shamamen 7 myńnan astam bir rettik doza bolady. Quny 4,5 mln teńge.
«Atalǵan fakti negizinde Qylmystyq kodekstiń «Ótkizý maqsatynsyz esirtki zattarymen zańsyz aınalysý» baby boıynsha sotqa deıingi tergeý bastaldy. Osy baptyń sanktsııasy úsh jyldan jeti jylǵa deıingi merzimge bas bostandyǵynan aıyrý túrindegi jazany kózdeıdi. Nashaqorlyqtyń aldyn alý, quqyq qorǵaý densaýlyq saqtaý jáne bilim berý organdary jumysynyń bir bóligi. Jyl saıyn oblysta polıtseılerdiń, jergilikti atqarýshy organdardyń, sondaı - aq úkimettik emes uıymdardyń ókilderiniń qatysýymen túrli profılaktıkalyq is-sharalar ótkiziledi», - deıdi Aqtóbe oblysy PD bastyǵy Atyǵaı Arystanov.