Polıtseıler úıinde ál ústinde jatqan ájeni qutqaryp aldy - SQO

ASTANA. QazAqparat - Soltústik Qazaqstan oblysy Aıyrtaý aýdanynyń tártip saqshylary úıinde qulap qalyp, qozǵalýǵa shamasy kelmeı qalǵan 80 jastaǵy ájeni qutqaryp aldy, dep habarlaıdy «QazAqparat» HAA tilshisi oblystyq ІІD baspasóz qyzmetine silteme jasap.

Aıyrtaý aýdanynyń Saýmalkól aýylynda 80 jastaǵy áje jalǵyz turyp jatqan. Qyzy Belarýs eline kóship ketken. Aýyldaǵy ájeniń birneshe kún boıy kórinbeı ketkenin ańǵarǵan kórshileri quqyq qorǵaýshylarǵa habar bergen. Polıtsııa qyzmetkerleri úıge birden kelip, ájeniń ál ústinde jatqanyn kórip, jedel járdem qyzmetin shaqyrǵan. Jedel árekettiń nátıjesinde áje aman qalypty.

Jaǵdaıdy estigen Belarýs elindegi keıýananyń qyzy Natalıa Smırnova SQO ІІD-ne alǵys hat joldaǵan.

«Anamnyń jaǵdaıy týraly birden sol jaqta turatyn aǵama habar berildi. Qutqaryp qana qoımaı, dárigerler anamdy jyly sózben qoldapty. Meniń anama kómek qolyn sozǵan barlyq quqyq qorǵaýshylarǵa zor alǵysymdy bildiremin», - dep jazǵan alǵys hatynda Natalıa Smırnova.