Polıtseıler poıyz jolaýshysynan asa iri mólsherde esirtki zatyn tárkiledi

ASTANA. QazAqparat – Kóliktegi polıtsııa qyzmetkerleri Shý stantsııasynda Almaty oblysynyń turǵynynan asa iri mólsherde esirtki zatyn tárkiledi, dep habarlaıdy QazAqparat polisia.kz telegram kanalyna silteme jasap.

Esirtkini Shý stantsııasyndaǵy vokzal perronynda qyzmettik ıt tapqan. Almaty oblysy turǵynynyń sómkesinen jalpy salmaǵy 12 keli 480 gramm «marıhýana» tabylyp, tárkilendi.

«Atalǵan fakti boıynsha QR Qylmystyq kodeksiniń 296-baby 4-bóligi, ıaǵnı esirtki quraldaryn asa iri mólsherde zańsyz saqtaý boıynsha sotqa deıingi tergep-tekserý bastaldy», - dedi Kóliktegi polıtsııa departamentiniń bastyǵy Baqytjan Malybaev.

Kúdiktiniń Shý aýdanynda jabaıy qarasora jınap, ony Almaty qalasyna temirjol kóligimen tasymaldaýdy josparlaǵany anyqtaldy.

«Ol polıtsııa bóliminiń ýaqytsha ustaý ızolıatoryna qamaldy, tergeý júrgizilip jatyr», - dedi B. Malybaev.

Vıdeodan alynǵan kadr