Polıtseıler planshetpen qansha xattama toltyrdy
Quqyqtyq statıstıka jáne arnaıy esepke alý jónindegi komıtettiń tóraǵasy Qaırat Jaqypbaevtyń aıtýynsha, búginde respýblıka boıynsha 925 polıtseı planshet ustap júr. Aldaǵy ýaqytta jergilikti bıýdjetterdiń esebinen qosymsha 4 myńnan astam komplekt satyp alynady. «Jarty jyldyń ishinde polıtseıler 160 myńnan astam elektrondy xattamany rásimdedi. Bul barlyq xattamalardyń 14 protsentin quraıdy. Osy oraıda, Astana, Almaty men Taraz qalalarynyń jumysyn erekshe atap ótken jón», - dedi Q.Jaqypbaev Bas prokýratýranyń alqa májilisinde.
Onyń aıtýynsha, Astanada «Sergek» júıesi óz nátıjesin kórsetti. Aqyly avtoturaqtarda ornatylǵan «Dozor» elektrondy júıesi de tıimdi bolyp shyqty. Osy ýaqytqa deıin beınebaqylaý arqyly 111 000-nan astam ákimshilik xattama rásimdeldi.
«Qazirgi kezde aıyppuldy jeńildikpen tóleýge bolady. Kez kelgen adam bank kartasymen aıyppuldy oqıǵa ornynda tóleı alady. Sonda aqsha jaǵynan jeńildik beriledi», - dep atap kórsetti Q.Jaqypbaev.
Aıta keteıik, aldaǵy ýaqytta komıtettiń aqparattyq júıelerine barlyq beıne baqylaý kameralaryn qosý josparlanǵan. Oǵan ákimdikterdiń, memlekettik jáne jeke menshik kompanııalardyń, tipti, jeke tulǵalardyń kameralary qosylady. Al «e-kýáger» degen elektrondy júıe barlyq beınejazbalarǵa taldaý jasap, tártip buzýshylyqtardy avtomatty túrde anyqtaıtyn bolady. «Bıznesmender jáne qarapaıym xalyq smartfonǵa «SOS» fýnktsııasyn ornatyp, polıtsııany shuǵyl shaqyrta alady. Osy jartyjyldyqta jańa júıeniń prototıpi Oral qalasynda engiziledi. Qazir Batys Qazaqstan oblysynyń prokýratýrasymen jáne jergilikti ákimdikpen tıisti jumystar pysyqtalyp jatyr. Kelesi jylda atalǵan bastamany pılottyq negizde qolǵa alamyz», - deıdi Q.Jaqypbaev.