Polıtseıler nesıeni onlaın rásimdeıtinderge eskertý jasady

QOSTANAI. QazAqparat – Qostanaı oblysynyń polıtsııa departamenti turǵyndardy ınternet-alaıaqtardan abaı bolýǵa shaqyrdy, dep habarlaıdy QazAqparat tilshisi.

Qostanaı oblysy krımınaldyq polıtsııa basqarmasynyń aǵa jedel ýákili Oljas Maǵyparovtyń aıtýynsha, 2020 jyly ınternet-alaıaqtyqtyń 798 faktisi tergeldi. Qylmystyń eń kóp taralǵan túri – onlaın nesıe berý. Bul jaǵdaıda alaıaqtar jalǵan jolmen azamattardyń derbes derekterin alady nemese onlaın-qaryzdardy rásimdeý úshin joǵalǵan qujattardy paıdalanady. Ótken jyly mundaı 200-den astam is ashyldy.

«Adamdar aldyn ala tólemdi banktik shotqa nemese vırtýaldy KIWI ámııanǵa aýdarady. Munyń jalǵan taýarlardy satyp alý ekenin bile bermeıdi. Pandemııa kezinde adamdar elektrondy ámııandardy, «ınternet-bankıngti» jıi qoldana bastady. Alaıaqtar ýaqyt ótken saıyn jańa aıla-tásilderdi oılap tabýda», — deıdi polıtsııa qyzmetkeri.

Oblystyq polıtsııa departamenti alaıaqtardyń qurbany bolmaýdyń jolyn aıtty:

- bank kartasynyń fotosyn beıtanys adamdarǵa jibermeńiz;

-sizdiń abonenttik nómirińizge kelip túsken sms-kodty úshinshi tulǵaǵa aıtpańyz (osylaısha siz tolyq qoljetimdilikti usynasyz)

- taýardy kimniń satatynyna kóz jetkizbeı, kepilzat qoımańyz(vıdeo qońyraý kómektesedi)

- jeke qujattaryńyzdy qaraýsyz qaldyrmańyz (alaıaqtar sizdiń jeke derekterińizdi ıemdenip, sizdiń atyńyzdan alaıaqtyq áreketter jasaı alady)

- beıtanys adamdardyń QIWI ámııanyna aqshany tastamańyz.

Eger siz osyndaı quqyq buzýshylyqtyń qurbany bolsańyz, turǵylyqty jerińiz boıynsha polıtsııaǵa habarlasýǵa bolady.