Polıtseıler men prokýrorlar áýe jáne temir jol kólikterindegi qaýipsizdik máselelerin talqylady

ALMATY. QazAqparat - Búgin, 21 qazan kúni Almaty qalasynda QR ІІM Kóliktegi ІІD kóshpeli keńeıtilgen májilisi bolyp ótti. Oǵan vedomstvo basshysy Amanjol Qabylov tóraǵalyq etti. Májiliste departamenttiń 2016 jylǵy 9 aıdaǵy jedel-qyzmettik jumystarynyń qorytyndysy talqylanyp, kólik polıtsııasynyń aldaǵy ýaqytta atqaratyn negizgi mindetteri naqtylandy. Basqosýǵa Bas kólik prokýrorynyń birinshi orynbasary Alpysbaı Tursynbekov, sondaı-aq departamenttiń qyzmetteri men onyń jelilik bólinisteriniń basshylary qatysty, dep habarlady Kóliktegi ІІD baspasóz qyzmetinen habarlandy.

Kóliktegi ІІD bastyǵy polıtsııa polkovnıgi Amanjol Qabylovtyń aıtýynsha, esepti merzim ishinde aldyn ala qabyldanǵan jedel-profılaktıkalyq sharalardyń arqasynda qylmystar sany 12%-ǵa jýyq tómendegen. Qylmystardyń ashylý kórsetkishi 70%-dan asqan.

Kólik saqshylary aǵymdaǵy jyldyń basynan beri aýyr jáne asa aýyr qylmystar jasap, ishki ister organdarynan jasyrynyp júrgen 32 qylmyskerdi, sonyń ishinde Qazaqstan aýmaǵynan tys 3 qylmyskerdi ustady. Sonymen qatar, esirtkiniń zańsyz taralý faktilerin anyqtaý jáne jolyn kesýge baǵyttalǵan birqatar aýqymdy sharalar júzege asyryldy. Máselen, departamenttiń aýmaqtyq bólinisteriniń kúshimen  zańsyz esirtki aınalymynyń 344 faktisi anyqtalyp, esirtki kontrabandasynyń 10 faktisiniń joly kesildi. Zańsyz esirtki aınalymynan 2 tonna túrli esirtki zattary, onyń ishinde 3 keliden asa geroın tárkilenip alyndy.

Memleket basshysynyń usaq quqyq buzýshylyqtarǵa «múldem tózbeýshilik» qaǵıdatyn qalyptastyrý tapsyrmasy  aıasynda   jyl basynan beri belgili maqsatqa baǵyttalǵan profılaktıkalyq jumystar atqaryldy. Nátıjesinde túrli quqyq buzýshylyqtar úshin 46 myńnan asa azamat ákimshilik jaýapkershilikke tartyldy. Sondaı-aq, kóshi-qon zańnamasyn buzǵany úshin 3098 sheteldik ákimshilik jaýapkershilikke tartyldy, onyń ishinde 242 sheteldik el aýmaǵynan tysqary shyǵaryldy.

A. Qabylov jeke quramǵa aldaǵy ýaqytta da mańyzdy is-sharalardyń kútip turǵandyǵyn aıtty. «Ózderińiz jaqsy bilesizder, búgingi kúni lańkestik áreketter kúlli álem alańdaýshylyǵyn týyndatyp otyr.  Biz el irgesiniń berik, kelesheginiń kemel bolýy, azamattarymyzdyń erteńge degen senimin arttyrý jolynda adal qyzmet ótkerýge tıispiz. Saqshylar úshin olardyń ómiri men quqyǵyn, erkindigin qorǵaý - basty basymdyq bolyp qala beredi. Ol úshin bizde erik pen jiger de, kásibı sheberlik te jetkilikti», - dedi elimizdiń bas kólik polıtseıi.

Budan soń ol Alpysbaı Tursynbekovke qylmysqa qarsy birlese atqarǵan  júıeli ári nátıjeli jumystar úshin alǵysyn bildirdi. «Qylmyspen kúresý - bul elimizdiń quqyq qorǵaý qurylymdarynyń basty mindeti. Qoǵamdyq tártipti nyǵaıtýda ózara áriptestiktiń bereri mol. Bul rette, ózara yqpaldastyǵymyzdyń odan ári arta beretindigine senim bildiremin», - deıdi polıtsııa polkovnıgi.

Óz kezeginde só alǵan QR Bas kólik prokýrorynyń birinshi orynbasary                    A. Tursynbekov qyzmet kórsetý aýmaǵynda azamattardyń konstıtýtsııalyq quqyqtarynyń saqtalýyna, ásirese jurtshylyq kóp shoǵyrlanatyn elimizdiń áýe jáne temir jol kóligi nysandarynda zań buzýshylyqtardy boldyrmaý boıynsha qabyldanýy tıisti sharalarǵa toqtaldy.

Shara barysynda 2017 jylǵy aqpan aıynda ótetin búkilálemdik qysqy Ýnıversıada kezinde Almaty qalasy áýejaıy men temir jol vokzalyndaǵy qoǵamdyq tártipti qamtamasyz etýge daıyndyq barysy da pysyqtaldy.

Keńesti qorytyndylaı kele, departament bastyǵy jelilik bólinister basshylaryna jedel-profılaktıkalyq jumystardy jandandyrý, tártip pen zańdylyqty nyǵaıtý, jeke quramy arasynda sybaılas jemqorlyq áreketterine jol bermeý boıynsha birqatar mindetter júktedi.