Polıtseıler bıyl 9 tonna marıhýana tárkiledi

NUR-SULTAN. QazAqparat – Elimizde 9 aıy ishinde 1929 esirtki qylmysy tirkelgen. Bul týraly QR Іshki ister mınıstrligi Esirtki qylmysyna qarsy is-qımyl departamentiniń basqarma bastyǵy Berikhan Nurǵalıev vedomstvonyń aqparat alańynda ótken onlaın brıfıngide aıtty, dep habarlaıdy QazAqparat tilshisi.

«Osy jyldyń 9 aıynda 1929 esirtki qylmysy anyqtaldy. Onyń ishinde 1136 esirtki ótkizý faktisi jáne 326 nashany iri kólemde saqtaý faktisi bar.

Uıymdasqan 7 qylmystyq toptyń joly kesildi. Olardyń ústinen toptardy qurdy jáne basqardy degen kúdikpen 13 qylmystyq is qozǵaldy.

12 tonnadan astam ár-túrli esirtki quraldary alyndy, onyń ishinde 4,9 kg geroın, 9 tonnadan astam marıhýana, 376 kg gashısh jáne 107 kg sıntetıkalyq esirtki bar», - dedi basqarma bastyǵy onlaın brıfıngide.

Onyń aıtýyna qaraǵanda, jyl basynan beri saqshylar 13 esirtki zerthanasynyń kózin joıǵan. Atap aıtsaq, Nur-Sultanda – 2, Qaraǵandy oblysynda – 4, Almatyda – 3, Soltústik Qazaqstan oblysynda – 3, Aqtóbe oblysynda – 1 zerthana tabylǵan.