Polıtseıler Astanadaǵy qurylys bazaryn tekserip jatyr

ASTANA. QazAqparat - Elordadaǵy qurylys bazaryn polıtsııa qyzmetkerleri tekserip jatyr, dep habarlaıdy QazAqparat tilshisi Astana ishki ister deparamentiniń baspasóz qyzmetine silteme jasap.

«Búgin qurylys nysandarynan, uıymdardan, garajdar jáne basqa jerlerden urlanǵan zattardy anyqtaý maqsatynda qurylys materıaldary bazary, Táýelsizdik dańǵylynyń boıynda, bazar aýmaǵynda ornalasqan avtomashınalarǵa qyzmet kórsetý stantsııalary tekserildi», - dep málimdedi departamenttiń baspasóz qyzmeti.

ІІD ókilderiniń aıtýynsha, shara barysynda qujatsyz satylyp jatqan ondaǵan qurylys quraldary men akkýmýlıatorlar tárkilengen, al satýshylar olardyń qaı jerden ákelingenin aıta almaǵan. Budan tys, tárkilengen 3 velosıpedtiń biri buryn urlanǵan bolyp shyqty.

Tárkilengen zattar boıynsha tekseris bastaldy. Sondaı-aq, birqatar ákimshilik jáne kóshi-qon zańnamasyn buzý faktileri anyqtaldy, endi olarǵa qatysty protsessýaldyq sheshimder shyǵarylady.

Astana polıtseıleri qala aýmaǵynda bótenniń múlkin urlaýǵa qarsy 2018-2020 jyldarǵa arnalǵan is-qımyldar keshendi josparyn jáne baǵdarlamasyn iske asyrý aıasynda josparly «Satyp alý» jedel aldyn alý sharasyn, sondaı-aq túsindirý jumystaryn júrgizip jatyr.