Polıtseıdiń jaǵasyna jarmasqan atyraýlyqqa 120 myń teńge aıyppul salyndy

ATYRAÝ. QazAqparat – Atyraý oblysynda polıtsııanyń jaǵasyna jarmasyp, qarsylyq kórsetken turǵynǵa 120 myń teńge aıyppul salyndy, dep habarlaıdy QazAqparat tilshisi.

Atyraý oblysynyń Mahambet aýdandyq sotynda J. esimdi er adamǵa qatysty ákimshilik is qaraldy.

Oǵan Ákimshilik quqyq buzý týraly kodekstiń 434-babynyń 1-bóligimen, 667-babynyń 1-bóligimen aıyp taǵylǵan.

«Mahambet aýdanynyń turǵyny J. 2023 jylǵy 19 sáýirde qoǵamdyq orynda jábirlenýshi K.-ge bylapyt sózder aıtyp, usaq buzaqylyq jasaǵan. Jábirlenýshi K-nyń shaqyrtýy boıynsha kelgen polıtsııa qyzmetkerleri buzaqylyqtyń sebebin anyqtaý maqsatynda quqyq buzýshy J-ny ustaýǵa tyrysqan. Alaıda, ol polıtsııa qyzmetkeri kıiminiń jaǵasynan alyp, qarsylyq kórsetken. Polıtsııa bólimine barýdan bas tartyp, olardyń zańdy talaptaryna baǵynbaǵan», -dep habarlady Mahambet aýdandyq sotynyń baspasóz qyzmeti.

Sot otyrysynda J. kinásin tolyqtaı moıyndaǵan. Jábirlenýshiden jáne polıtsııa qyzmetkerinen keshirim suraǵan.

Quqyq buzýshy anasynyń densaýlyq jaǵdaıyna baılanysty ózine qatysty ákimshilik qamaqqa alý túrindegi jazany qoldanbaýdy surady.

Sot qaýlysymen J. kináli dep tanylyp, oǵan 120 myń 750 teńge ákimshilik aıyppul salyndy.

Sot qaýlysy zańdy kúshine endi.

Eske sala ketelik, buǵan deıin Atyraýda medbıkeni balaǵattaǵan er adam 5 táýlikke qamaýǵa alynǵanyn habarlaǵan bolatynbyz.

Atyraý qalasynda turatyn er adam aýrýhanadaǵy medbıkege dórekilik tanytyp, bylapyt sóılegen.

Atalǵan derek boıynsha 42 jastaǵy azamatqa qatysty QR Ákimshilik quqyq buzý týraly kodekstiń 434-babynyń 1-bóligimen ákimshilik hattama toltyryldy.

Sot qaýlysymen 1981 jylǵy azamat usaq buzaqylyq jasaǵany úshin kináli dep tanyldy.

Ol 5 táýlikke qamaqqa alý túrindegi ákimshilik jazaǵa tartyldy.