Polıtseı men prokýrorǵa qatysty «parasattylyqqa tekserý» ınstıtýty engiziledi

NUR-SULTAN. QazAqparat - Qazaqstanda polıtseı men prokýrorǵa qatysty Integrity Check parasattylyqqa tekserý ınstıtýty engizilmek. Bul týraly búgin QR Sybaılas jemqorlyqqa qarsy is-qımyl agenttiginiń alqa májilisinde vedomstvo basshysy Alık Shpekbaev aıtty, dep habarlaıdy QazAqparat tilshisi.

Onyń aıtýynsha, quqyq qorǵaý men baqylaý-qadaǵalaý organdarynyń qyzmetkerlerine qatysty Integrity Check parasattylyqqa tekserý ınstıtýtyn engizý kózdelip otyr. Bul sheneýniktiń sybaılas jemqorlyqqa beıimdiligin anyqtaýǵa baǵyttalǵan aldyn-alý sharasy, qarapaıym qural.

Ony agenttik, sondaı-aq quqyq qorǵaý organdarynyń jeke qaýipsizdik qurylymdary erekshe óndiris jáne sottyń qatań sanktsııasymen júzege asyrady.

«Parasattylyqqa tekserýden ótpegen, naqtyraq aıtqanda materıaldyq nemese ózge de paıda men artyqshylyqtardy alýǵa kelisim bergen tulǵa qylmystyq qýdalaýsyz jumystan shyǵarylady. Mundaı tájirıbe Eýropa elderi men AQSh-ta qoldanylady. Agenttik osy quqyqtyq normalardy ázirledi jáne zańnamalyq pysyqtaýǵa ázir», - dedi ol.

Agent tóraǵasynyń dereginshe, bul bastamany barlyq memlekettik organdar qoldaǵan jáne taıaý arada Úkimettiń tıisti qaýlysyna ózgertýler engiziletin bolady.