«Polıtseı» qońyraý shalǵan: Zeınetker alaıaqqa 5,5 mln teńgesin berip qoıdy
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavldyń 76 jastaǵy turǵynyna bireýler qońyraý shalyp, «sizdiń qyzyńyz jol-kólik oqıǵasynyń sebepkeri boldy, onyń kesirinen júkti áıel ólim aýzynda jatyr» dep habarlasqan. Telefonnyń ar jaǵyndaǵy beıtanys ózin polıtsııa qyzmetkeri retinde tanystyrǵan. Onyń aıtýynsha, apattan zardap shekken áıeldiń týystary olarǵa úlken somada aqsha tólengen jaǵdaıda aryz jazbaýǵa kelisken. Kútpegen habardan eseńgiregen zeınetker kelisip, úıine kelgen kýrerge óziniń barlyq jınap-tergen 5,5 mıllıon teńge aqshasyn berip jibergen.
Kóp uzamaı onyń qyzy úıge kelip, oqıǵaǵa qanyqqannan keıin dereý polıtsııaǵa júgingen. Tártip saqshylary kýrerdi alysqa uzatpaı ustady. Aqsha tárkilendi. Polıtseılerdiń aıtýynsha, ol Petropavlda tirkelgen alaıaqtyqtyń taǵy eki faktisine qatysy bolýy múmkin.
«Petropavldyń 17 jastaǵy turǵyny ustaldy, kámeletke tolmaǵandyǵyna baılanysty ol ata-anasynyń kepildik berýimen bosatyldy. Bul fakti QR Qylmystyq kodeksiniń 190-baby 3-bóligi «Alaıaqtyq» boıynsha sotqa deıingi tergep-tekserýlerdiń biryńǵaı tizilimine tirkeldi. Adamdardy osylaısha aldaý shemasy keńinen taralyp keledi. Sondyqtan turǵyndardy eskertkimiz keledi. Osyndaı jaǵdaıda áńgimeni úzip, alaıaqtar sóz etip otyrǵan týystaryńyzǵa habarlasyńyzdar, jol-kólik oqıǵasy faktisiniń joqtyǵyna kóz jetkizý úshin «102» arnasyna dereý qońyraý shalý qajet», - deıdi SQO PD Petropavl qalalyq polıtsııa basqarmasynyń bastyǵy Erbol Taıbekov.