Polshadan qarjy pıramıdasy jetekshileriniń biri ekstradıtsııalandy - Bas prokýratýra

ASTANA. QazAqparat – Polshanyń Ádilet mınıstrligi transulttyq uıymdasqan top quramynda «QI Trade Kazakhstan» qarjy pıramıdasyn basqarǵany úshin izdeýde júrgen kúdiktini ekstradıtsııalady. Bul týraly QazAqparat Bas prokýratýranyń baspasóz qyzmetine silteme jasap habarlaıdy.

Ol «2018-2020 jyldary qarjy pıramıdasy jetekshileriniń biri bola tura, bótenniń múlkin jymqyrý maqsatynda mol paıyzdyq tabyspen qyzyqtyryp, azamattardyń aqshalaı salymdaryn jalǵan jobalarǵa tartýdyń qylmystyq shemasyn uıymdastyrǵan» degen kúdikke ilingen.

Uıymdasqan top músheleriniń qylmystyq áreketterinen zardap shekken 1 345 jábirlenýshige 6,3 mlrd teńgeden astam shyǵyn keltirilgen.

Qylmys jasaǵannan keıin K. esimdi kúdikti qylmystyq qýdalaý organdarynan jasyrynyp, oǵan halyqaralyq izdeý jarııalanǵan.

Búgin Bas prokýratýra men Іshki ister mınıstrliginiń qyzmetkerleri Syrtqy ister mınıstrliginiń kómegimen kúdiktini qylmystyq jaýapkershilikke tartý úshin Qazaqstanǵa ekstradıtsııalady. Ol Astanadaǵy ýaqytsha ustaý ızolıatoryna qamaldy. Qylmysy úshin 5 jyldan 12 jylǵa deıin bas bostandyǵynan aıyrylýy múmkin.

Aıta ketý kerek, Polsha alǵash ret izdeýde júrgen adamdy Qazaqstanǵa ekstradıtsııalady, bul bizdiń elimizde júrgizilip jatqan reformalarǵa, onyń ishinde qylmystyq-quqyqtyq salaǵa degen senimniń artqanyn kórsetedi.