Polsha Qazaqstanmen yntymaqtastyqty joǵary baǵalaıdy - Zbıgnev Raý

NUR-SULTAN. QazAqparat – EQYU Qazaqstanmen aradaǵy yntymaqtastyqty joǵary baǵalap otyr. Bul týraly elordada Qazaqstan dıplomattarymen kezdesýden keıin Polsha Syrtqy ister mınıstri Zbıgnev Raý aıtty, dep habarlaıdy QazAqparat tilshisi.

Polıak dıplomaty Eýropadaǵy qaýipsizdik jáne yntamaqtastyq uıymynyń Іs basyndaǵy tóraǵasy retinde Ortalyq Azııa elderine sapary aıasynda eki kúndik resmı saparmen Qazaqstanǵa keldi.

«Qazaqstanǵa sapar aıasynda mańyzdy kelissózder ótti. EQYU múshe elder arasynda senim men yntymaqtastyqty nyǵaıtý úshin eń ózekti platforma bolyp qalyp otyr. Biz qaýipsizdiktiń keshendi aspektisi boıynsha yntymaqtastyq ornattyq. Jalpy, túrli salada qazaq áriptestermen baılanystardy nyǵaıtýǵa múddelimiz. Qazaqstan Respýblıkasynyń EQYU-daǵy músheliginiń 30 jyldyǵyn atap óttik. Osy oraıda Qazaqstan osy uıymnyń damýyna eleýli úles qosty jáne EQYU-nyń mańyzdy múshesi bolyp qala beredi. 2010 jyly EQYU-ǵa Qazaqstannyń tóraǵalyǵy men uıymnyń (Nur-Sultan qalasyndaǵy) sammıti osyǵan dálel», - dedi Zbıgnev Raý.

Osy oraıda ol Qazaqstannyń uıymǵa tóraǵalyǵy kezinde qaýipsizdik máselelerine mán berilgenin, Ortalyq Azııa óńirine qatysty mańyzdy máseleler talqylanǵanyn atap ótti.

«Prezıdent Qasym-Jomart Toqaevtyń bastamasymen júrgizilip jatqan reformalar adam quqyqtaryn qorǵaý salasyndaǵy oń qadamdardy baıqatyp otyr. Bul turǵyda 5 maýsym kúni ótetin referendýmnyń mańyzy zor. Qazaqstan Úkimetimen yntymaqtastyqty joǵary baǵalaımyz jáne ózara baılanystardy damytýǵa qoldaý jasaıtyn bolamyz», - dedi Z. Raý.

Budan buryn habarlanǵandaı, elordada Polsha delegatsııasymen kezdesýden keıin QR Syrtqy ister mınıstriniń birinshi orynbasary Aqan Rahmetýllın Polsha Qazaqstannyń Eýropadaǵy mańyzdy seriktesiniń biri ekenin atap ótti.