Polsha Qazaqstanmen alys-beristi úsh esege arttyrýdy kózdeıdi

ASTANA. QazAqparat  -  Qazaqstan Prezıdenti Nursultan Nazarbaevtyń Polshaǵa jasaǵan ótken jylǵy saparynan keıin eki eldiń alys-berisi burynǵy deńgeıge kóterildi. Bul týraly Polsha basshysy Andjeı Dýda aıtty, dep xabarlaıdy QazAqparat tilshisi.

"2014 jyly Qazaqstan men Polshanyń taýar aınalymy 2 mlrd dollardan asqan edi. Keıin atalǵan kórsetkish kúrt tómendep ketti. Oǵan jahandaǵy saıası máseleler sebep boldy. Bylaısha aıtqanda, biz sonyń qurbanyna aınaldyq. Degenmen, birlesken jumystyń arqasynda biz burynǵy deńgeıimizge shyǵyp kelemiz. Aǵymdaǵy jyldyń alty aıy boıynsha Polshadan Qazaqstanǵa ketken eksport 50 paıyzǵa artsa, Qazaqstannan Polshaǵa keletin taýarlardyń kólemi 80 paıyzǵa ósti. Sondyqtan úlken progress bar deýge ábden bolady", - dedi Dýda Astanadaǵy bıznes-forýmda.

Polsha Prezıdenti aldaǵy alty jylda ekijaqty taýar aınalymyn 6 mlrd dollarǵa jetkizýge bolady dep sanaıdy. Osy oraıda ol Memleket basshysy Nursultan Nazarbaevtan qolǵabys jasaýdy surady. Sebebi saıası sheshimder taýar aınalymyn aıtarlyqtaı kótere alady.

Aıta keteıik, búgin Qazaqstan men Polsha Prezıdentteri Astanada ótken bıznes-forýmǵa qatysty. Sol jerde Elbasy farmatsevtıkalyq salany damytý máselesine basa nazar aýdardy.

Sondaı-aq, Nursultan Nazarbaev Qytaı bastamasyna ne úshin qosylǵanyn aıtty. Al Polsha basshysy Andjeı Dýda 2022 jylǵy EKSPO úshin talasta Qazaqstannan qoldaý bildirýdi surady.