Polsha Qazaqstanǵa gýmanıtarlyq kómek jóneltti

NUR-SULTAN. QazAqparat - Búgin Polshadan otandyq «SCAT» áýekompanııasynyń charterlik reısimen elimizge gýmanıtarlyq júktiń kezekti partııasy keldi, dep habarlaıdy QazAqparat QR Syrtqy ister mınıstrligine silteme jasap.

Gýmanıtarlyq júkte «Wipasz» polıak kompanııasy óndiretin kóp márte qoldanylatyn medıtsınalyq maskalar (100 myń dana), sondaı-aq knıaz Lıýbomırskıı Qorynyń qazaqstandyq oqýshylardy qashyqtan oqytý úshin syıǵa bergen kompıýterleri (noýtbýkter) qamtylǵan.

«Polıak eliniń Qazaqstan úshin jasaǵan shynaıy dostyq yqylasy COVID-19 pandemııasymen kúrestegi jahandyq yntymaqtastyqtyń kórnekti úlgisi bolyp tabylady. 2020 jylǵy 17 naýryz-12 sáýir aralyǵynda Qazaqstanǵa AQSh, Qytaı, Ońtústik Koreıa, Japonııa, Túrkııa jáne BAÁ-nen gýmanıtarlyq kómek jetkizilgeni belgili. Buǵan qosa, qytaılyq dárigerler Qazaqstanǵa ózderiniń tájirıbelerimen bólisýge kelse, Izraıl, Ońtústik Koreıa jáne Japonııa dárigerleri koronavırýspen kúresý boıynsha qazaqstandyq áriptesterimen onlaın-rejımde tájirıbe almasty», - delingen QR SІM aqparatynda.