Polsha Astananyń botanıkalyq baǵyna tosyn syı jasady
Osyndaı erekshe is-qımyldarymen polıaktar qala turǵydaryn Elorda kúnimen quttyqtaýdy jón kórdi.
«Qazaqstan úshin osy aıtýly datada qalanyń barlyq turǵyndary men qonaqtaryna barlyq jaqsylyqty tileımin. Atap aıtqanda, Qazaqstan Prezıdentiniń eldi kógaldandyrý boıynsha bastamalary óte qýantady. Bul baǵyttaǵy qadamdar jahandyq turǵyda mańyzdy ekenin túsinemiz. Búginde «EKSPO-2017» halyqaralyq kórmesi aıasynda qala aýmaǵyn jasyldandyrý men orman alqabyn keńeıtý arqyly kómirqyshqyl gaz kólemin tómendetý bastamalary asa qajet», - dedi Polsha qorshaǵan orta vıtse-mınıstri Slavomır Mazýrek.
Sonymen qatar bul shara barysynda elordalyqtardy Astana ákiminiń orynbasary Ermek Amanshaev ta quttyqtady.
«Ákimdik atynan búgingi keremet merekemen barlyqtaryńyzdy quttyqtaımyn. Birneshe kún buryn Astana kúnin merekeleý baǵdarlamasyna bastaý bergen Elbasy qalanyń jasyl beldeýiniń mańyzdylyǵy týraly aıtqan bolatyn. Botanıkalyq baq osy mańyzdy jobanyń quramdas bóligi. Bul baqtyń perspektıvasy zor, sebebi osynda úlken bastamalar iske asyrylady. Búgin Polshadan arnaıy 214 aǵash alyp kelip, otyrǵyzyp jatqan polıak dostarymyzǵa úlken alǵysymyzdy aıtamyz», - dedi E. Amanshaev.
Aıta keteıik, polıaktardyń búgingi bastamasyna EKSPO-daǵy ózge de pavılondardyń ókilderi qoldaý bildirdi.
Budan buryn Polsha ormanshylary ormandy jerlerdi qalpyna keltirý baǵytynda qazaqstandyq áriptesterimen tájirıbe almasqan bolatyn. Osy taqyryptaǵy konferentsııa EKSPO aıasynda Polsha pavılonynda ótti.