Poezııadan ekonomıkaǵa: Rýmynııa Qazaqstanmen yntymaqtastyqty nyǵaıtýǵa daıyn

BÝHAREST. QazAqparat - 18-19 qarashada Qazaqstannyń Rýmynııadaǵy tótenshe jáne ókiletti elshisi Nurbah Rústemov Dolj oblysyna jumys saparymen bardy. Sapar aıasynda qazaqstandyq dıplomat oblys jáne Kraıova qalasynyń basshylyǵymen kezdesti, dep habarlaıdy QazAqparat.

Elshiliktiń málimetinshe, Nurbah Rústemov Dolj oblysy jergilikti Keńesiniń Prezıdenti Kosmın Vasılemen jáne prefekt Nıkýshor Roshkamen kezdesýde óńirlik yntymaqtastyqty jandandyrýdyń jáne Qazaqstan óńirleriniń birimen baýyrlastyq baılanys ornatýdyń jańa joldaryn talqylaǵan.

Kelissóz barysynda saýda-ekonomıkalyq jáne mádenı-gýmanıtarlyq áriptestikti damytýǵa basty nazar aýdaryldy.

Sonymen qatar, Kraıova qalasynyń meri Lııa Olgýts Vasıleskýmen kezdesýde saýda, bilim jáne mádenıet salalaryndaǵy óńirlik yntymaqtastyqty damytý perspektıvalary qarastyryldy.

Mıhaı Emıneský atyndaǵy Halyqaralyq akademııa prezıdenti Ioan Dıakoneskýmen kezdesý barysynda qazaqstandyq dıplomat rýmyn tarapynyń eki el arasyndaǵy mádenı yntymaqtastyqty nyǵaıtý jónindegi bastamalaryn qoldaıtynyn atap ótip, odan ári jemisti ózara is-qımylǵa senim bildirdi.

2021 jylǵa arnalǵan is-sharalar kestesi aıasynda «Abaı-Mıhaı Emıneský» halyqaralyq poezııa festıvalin ótkizý, Nur-Sultanda Mıhaı Emıneský bıýstin ornatý, sondaı-aq Qazaqstanda Mıhaı Emıneský poemalaryn aýdarý jáne jarııalaý josparlanyp otyr.

Jumys saparynyń mańyzdy pýnkti - saýda-ónerkásip palatasy men óńirlik bıznes qoǵamdastyq (Ade Gas, Topges Proiect jáne basqa) ókilderiniń qatysýymen «Invest in Kazakhstan» dóńgelek ústelin ótkizý boldy.

Іs-shara barysynda elshi perspektıvalyq ınvestıtsııalyq jobalar men AHQO qyzmetin tanystyryp, Qazaqstan ekonomıkasynyń basym sektorlary týraly habardar etti.

Sonymen qatar, ekijaqty saýda-ekonomıkalyq baılanystardy nyǵaıtý múmkindikterin jandandyrý jóninde pikir almasyldy.

Osylaısha, kásipkerlerdiń ekijaqty saparlaryn uıymdastyrý jáne 2021 jyly Qazaqstan-Rýmynııa bıznes-forýmyn ótkizý jóninde ýaǵdalastyq jasaldy.

Sondaı-aq, Kraıova qalasyndaǵy ındýstrıaldy parkin aralaý barysynda bas dırektor Ionýts-Kosmın Pyrvýleský parktiń qyzmetimen tanystyryp, otandyq jáne sheteldik kompanııalaryna jasalǵan qolaıly jumys jaǵdaıy týraly habarlady (qazirgi ýaqytta 48 kásiporyn tabysty jumys isteýde).

Óz kezeginde elshi osyndaı ındýstrııalyq parkterdi qurýdyń jáne olardyń jumys isteýiniń qazaqstandyq tájirıbesi týraly aıtyp berdi.

Aıta keteıik, Dolj oblysy Rýmynııanyń Oltenııa tarıhı aımaǵynyń ońtústik-batysynda ornalasqan. Halyq sany - 750 myń adam.

Ekonomıkanyń negizgi sektorlary - aýyl sharýashylyǵy, aýyr ónerkásip, toqyma, mehanıkalyq bólshekter men jınaqtaýyshtardy daıyndaý jáne basqalar.