Podpolkovnık turǵyn úı ótemaqysyna zańsyz 22,4 mln teńge qarjyny alǵan

KÓKShETAÝ. QazAqparat - Áskerı qyzmetshi baspanaǵa qatysty alaıaqtyq jasaǵany úshin sottaldy, dep habarlaıdy QR Áskerı sotynyń saıty.

Aqmola garnızonynyń áskerı soty QR QK-niń 190-baby 4-bóligi 2-tarmaǵy (Alaıaqtyq) boıynsha áskerı qyzmetshige qatysty qylmystyq isti qarady.

«Podpolkovnık J. Turǵyn úı komıssııasyna jyljymaıtyn múlkiniń joqtyǵy týraly jalǵan anyqtama usynyp, 22 432 410 teńge somasynda qyzmettik baspanany tegin jekeshelendirý quqyǵynyń ornyna zańsyz aqshalaı ótemaqy alǵan. Osylaısha, aldaý jolymen memleketke iri kólemde zalal keltirdi», - delingen Aqmola garnızony áskerı soty baspasóz qyzmetiniń habarlamasynda.

Sottyń úkimimen áskerı qyzmetshi kináli dep tanylyp, 5 jylǵa bas bostandyǵynan aıyrý jazasy taǵaıyndaldy. Sondaı-aq, ol sottyń úkimimen «podpolkovnık» áskerı sheninen aıyrylyp, 22 432 410 teńge somasynda materıaldyq zalal óndirildi.