Pnevmonııa sımptomdary: Qaı kezde dabyl qaǵý kerek

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide joǵary sanatty pýlmonolog, medıtsına ǵylymdarynyń doktory Natalıa Latypova pnevmonııany ajyratý joldaryn aıtty, dep habarlaıdy QazAqparat tilshisi.

«Pnevmonııa belgileri birden paıda bolmaıdy. Respıratorlyq túri kem degende 5-7 kúnnen keıin paıda bolady. Qarapaıym jótel, demikpe, tynys alýdyń tarylýy, ózińdi jaısyz seziný jáne keýde tusynyń aýyrýy pnevmonııanyń belgisi bolýy múmkin. Tynys alý joldarynyń zaqymdanýy osy belgilerdiń birtindep órshýinen bastalady», - deıdi Natalıa Latypova.

Onyń aıtýynsha, osy belgilerdiń paıda bolýy ókpeniń qanshalyqty zaqymdanǵanyna baılanysty.

«Eger osy belgiler órshimese, dene qyzýynyń kóterilýi saqtalmasa, osy belgiler 7 kúnnen artyq bolmasa - ýaıymdaýdyń qajeti joq. Bul antıbıotık qabyldaıtyn nemese kompıýterlik tomografııa jasaýǵa sebep emes. Eger bul belgiler ýaqyt ótken saıyn kúsheıe bastasa, dene qyzýy túspeı qoısa ókpeni qaratý kerek jáne emdeý ádisin ózgertý kerek», - deıdi ol.