Pııaz óndirýshilerdiń jarty óniminiń shirip ketkeni jalǵan - mınıstrlik
«Ótken jyly elimizde 1 mln 100 tonna pııaz óndirildi. Onyń ishinde 900 myń tonna pııaz eksporttaldy. Ótken aptada pııaz óndirýshilermen kezdesip, qansha ónim qalǵanyn suradym. Olardyń málimetine sáıkes, 100 myń tonna pııaz qaldy. Sondyqtan, «otandyq óndirýshilerdiń pııazy shirip ketti, dalaǵa tastaldy» degen jalǵan aqparat», - dedi saýda jáne ıntegratsııa birinshi vıtse-mınıstri Arman Shaqqalıev ortalyq kommýnıkatsııalar qyzmeti alańynda ótken baspasóz máslıhatynda.
Odan ári pııaz eksportyna qatysty Saýda jáne ıntegratsııa mınıstrligi saýda komıteti tóraǵasynyń mindetin atqarýshy Aıdar Ábildabekov tolyqtyrdy.
«Men bıyl aqpanda pııaz óndirýshi eki iri kásiporynǵa bardym, olar – Jambyl oblysyndaǵy Qordaı jáne Shý aýdanynda. Qoımalarda 80-90% pııaz boldy, araǵa bir aı salyp naýryzda taǵy bardym, pııazdyń 20-30%-y ǵana qalypty. Demek, qalǵany satyldy degen sóz. «Óndirilgen pııazdyń jartysy shirip ketti» degen shyndyqqa janaspaıdy. Jalpy, pııaz máselesi buǵan deıin memleketaralyq komıssııa jáne jergilikti ákimdiktermen birlesip qaraldy. Qoımalardaǵy pııaz qory eki ret tekserildi», - deıdi saýda komıtetiniń basshysy.
Eske sala keteıik, bıyl qańtarda Aýyl sharýashylyǵy mınıstriniń buıryǵymen pııazdy elden shyǵarýǵa tyıym salynǵan edi.
8 sáýirde Qazaqstan pııaz eksportyna salynǵan tyıymdy alyp tastady.