Pııaz eksporttaý úshin 15 myń tonnaǵa arnalǵan kvota qaldy

ASTANA. QazAqparat – Pııazdy elden shyǵarýǵa salynǵan shekteý alynyp tastalǵannan beri 34 kásipker kvota sheńberinde eksporttaýǵa ruqsat aldy, dep habarlaıdy QazAqparat tilshisi.

Aıta keteıik, Aýyl sharýashylyǵy mınıstrligi taıaýda pııaz eksportyna salynǵan shekteýdiń kúshin joıdy. Alaıda, shet elge shyǵarýǵa 20 myń tonna kóleminde kvota belgiledi.

Vedomstvo aqparatyna saı, 13 sáýirge deıin 34 kásipker 4 828 tonna pııazdy ózge memeleketterdiń naryǵyna shyǵarýǵa ruqsat alǵan. Kvota boıynsha endi 15 171 tonna qalyp otyr.

Toqtala ketsek, jaqynda jaýapty mınıstrlik 28 sáýirge deıin Qazaqstan aýmaǵynan 20 000 tonna pııazdy úshinshi memleketterge jáne Eýrazııalyq ekonomıkalyq odaq elderine áketýge kvota engizgen bolatyn.