Pitir-sadaqadan túsken aqsha qaıda jumsalady - QMDB jaýaby

NUR-SULTAN. QazAqparat - Bıylǵy Ramazan aıynda jınalatyn pitir-sadaqadan túsken qarajat qaıda jumsalady? Bul suraqqa Ortalyq kommýnıkatsııalar qyzmetinde ótken baspasóz máslıhatynda Qazaqstan Musylmandary dinı basqarmasynyń baspasóz hatshysy Aǵabek Qonarbaıuly jaýap berdi, dep habarlaıdy QazAqparat tilshisi.

«Jýyrda elimizdiń Bas múftıi - Serikbaı qajy Oraz musylman qaýymǵa úlken úndeý jarııalady. Úndeýdiń negizgi mátini - jaqsylyqtan jarysaıyq. Rasynda da, Ramazan -qaıyrymdylyq pen jaqsylyqtyń úlken merekesi. Árbir jasalǵan jaqsylyq birneshe ese saýap bolyp jazylady. Bizdiń meshittiń Aqyldastar alqalary Ramazan aıynyń aldynda kásip ıelerine - dúken ıelerine ótinish jasady. Qasıetti aıda araq-sharap satylmasa, dúken sórelerinen alynyp tastalsa, azyq-túlikterge 10 paıyz jeńildik jasalsa, qoǵamdyq kólikterde jeńildik jasalsa degen uran tastadyq. Buǵan qulaq asyp jatqandar bar. Jýyrda Áziret Sultan meshitiniń janynan arnaıy qoǵamdyq kólikterdiń tegin tasymaldaý júıesin engizdik. Ásirese, keshki taraýyq namazynan keıin úlken aqsaqaldardyń, apalarymyzdyń qoǵamdyq kólikpen úıine tegin jetýine múmkindik bar», - dedi ol.

Aǵabek Qonarbaıulynyń aıtýyna qaraǵanda, bıylǵy Ramazan aıynyń negizgi úndeýi - kópbalaly otbasylarǵa kómek berý.

«Dinı basqarma bir jyldyń kóleminde 15 otbasyǵa úılerdiń kiltin tabystady. Kópbalaly otbasylardyń páter máselesin sheship berýdi jer-jerden surap jatyrmyz. Úndeýimizdi qabyl alǵan kásipkerler habarlasyp, kómek berý nıetterin bildirýde. Bıyl pitir-sadaqanyń kólemi - 300 teńge. Ony bıdaı baǵasynyń eń tómengi naryǵymen eseptedik. Eger qaltaly azamattar bolsa, qurmanyń, unnyń baǵasymen berýge bolady. Bul - eń tómengi mólsherleme. Jan basyna shaqqanda 300 teńgeden beremiz. Osy pitir sadaqanyń esebinen muqtaj kisilerge kómektessek deımiz. Meshitterdiń janynan arnaı komıssııa qurylady. Sol komıssııalardyń sheshimimen muqtaj jandarǵa pitir-sadaqanyń esebinen kómek kórsetiledi», - deıdi QMBD baspasóz hatshysy.

Aǵabek Qonarbaıulynyń aıtýynsha, pitir-sadaqadan túsken qarajatqa kópbalaly otbasylarǵa, jetimderge, qaraýsyz qarııalarǵa, asyraýshysy joq azamattarǵa qoldaý kórsetiledi.

«Árbir ákimdiktiń janynda tizim bar. Sol tizim boıynsha biz muqtaj jandardyń úıine qajetti zattardy nemese qarajatty tabystaımyz. Sonymen qatar, ol qarjy meshitterdiń kommýnaldyq shyǵyndaryna jumsalady», - deıdi ol.

Aıta ketsek, búgin Islam álemi úshin qasıetti, berekege toly, on eki aıdyń sultany sanalatyn Ramazan aıy bastaldy. Oraza 6 mamyrdan 5 maýsymǵa deıin jalǵasady.

Bıylǵy Ramazan aıynda beriletin pitir-sadaqanyń kólemi buǵan deıin de habarlanǵan bolatyn.