Pıter Býrıan Eýropalyq keńes Basshysynyń Qasym-Jomart Toqaevqa hatyn jetkizdi
«Eýropalyq keńestiń Basshysy Sharl Mısheldiń Prezıdent Qasym-Jomart Toqaevqa joldaǵan hatyn alyp keldim. Bul hatta Qazaqstanda júrgizilip jatqan reformalarǵa baǵa berilgen», - dedi Pıter Býrıan seısenbi kúni jýrnalıstermen bolǵan kezdesýde.
Eýropalyq keńestiń Basshysy óz hatynda Qazaqstannyń da, Eýropalyq odaqtyń da órkendeý jolyndaǵy birlesken jumysqa ózgerissiz beıilin bildiredi.
«Onda ortaq qundylyqtar negizinde yntymaqtastyqty odan ári tereńdetýge beıildiligimiz málimdeledi. Sharl Mıshel keńeıtilgen seriktestik pen yntymaqtastyq týraly jańa Kelisim (Qazaqstan men EO arasyndaǵy – red.) bizdiń qarym-qatynasymyzdy damytý úshin berik negiz qurǵanyn qýattaıdy», - dep atap ótti joǵary dárejeli eýropalyq dıplomat.
«Hatta Qazaqstannyń óńirlik kóshbasshylyǵyna jáne Eýropalyq odaqtyń óńirlik syn-qaterlerdi, sonyń ishinde Aýǵanstandaǵy qaqtyǵysty retteýdi birlesip sheshýge daıyndyǵyna baǵa berilgen», - dedi EO-nyń Ortalyq Azııa boıynsha arnaıy ókili.
Spıkerdiń aıtýynsha, hatta Eýropalyq keńestiń Basshysy Sharl Mısheldiń Qazaqstan Prezıdenti Qasym-Jomart Toqaevty Brıýsselge shaqyrýy da bar.
Aıta keteıik, EO-nyń Ortalyq Azııa boıynsha arnaıy ókili Qazaqstanǵa saparynyń baǵdarlamasynda Syrtqy ister mınıstri Muhtar Tileýberdimen, QR Prezıdentiniń Halyqaralyq yntymaqtastyq jónindegi arnaıy ókili Erjan Qazyhanovpen, Parlament depýtattarymen jáne bıznes ókilderimen kezdesýleri bar.