Pıter Býrıan: EO Ortalyq Azııadaǵy túrli geosaıası oıyndarǵa aralasqysy kelmeıdi

ASTANA. QazAqparat - Eýropalyq Odaq Ortalyq Azııadaǵy túrli geosaıası oıyndarǵa aralasqysy kelmeıdi. Kerisinshe, aımaqtyń gúldenýine úles qosqandy jón kóredi.

Bul týraly Qazaqstan Respýblıkasy Tuńǵysh Prezıdenti - Elbasy kitaphanasynda elordanyń 20 jyldyǵyna arnalǵan «Astana - beıbitshilik qalasy» atty halyqaralyq ǵylymı-tájirıbelik konferentsııa barysynda Eýropalyq Odaqtyń Ortalyq Azııa boıynsha arnaıy ókili Pıter Býrıan málim etti, dep habarlaıdy QazAqparat tilshisi.

«Eń aldymen, men Astana qalasynyń 20 jyldyq mereıtoıymen quttyqtaǵym keledi. Bul óte mańyzdy data», - dedi Pıter Býrıan.

Osydan keıin jalpy Ortalyq Azııa men Eýropalyq Odaqtyń ekonomıkalyq baılanysyna oıysqan Pıter Býrıan qos aımaqtyń seriktestigine úlken senim bildirdi.

«Meniń paıymdaýymsha, Eýropanyń Qazaqstan jáne Ortalyq Azııadaǵy ózge de memleketter sekildi óte senimdi seriktesi bar. Biz Sizderdiń jańǵyrý joldaryńyzdy qoldaı otyryp, aımaqtyq seriktestik pen turaqty damý baǵytyndaǵy qadamdaryńyzǵa qoldaý bildiremiz. Sebebi, bizdiń oıymyzsha, aımaqtyq seriktestik qazirgi ýaqyttaǵy kóptegen jahandyq syn-tegeýrinderge tótep bere alady», - deıdi Pıter Býrıan.

Onyń aıtýynsha, Eýropalyq odaq 2017 jyly Ortalyq Azııaǵa arnalǵan jan-jaqty strategııany qabyldaǵan.

«Biz Sizderdiń aımaqtaryńyzda seriktese eńbek etsek deımiz. Syrtqy ister mınıstrimen (Qaırat Ábdirahmanov - avt.) kezdesý kezinde bizdiń ókilder tipti keleshegi zor kún tártibi týraly aıtqan bolatyn. Demek, biz 2017 jylǵy strategııany jańartyp, aımaqtaǵy jańa jaǵdaılarǵa beıimdelsek deımiz. Sonymen birge, bizdiń seriktesterdiń qajettiligin kóptep qanaǵattandyrý jaǵyn da oılastyrsaq deımiz. Strategııa boıynsha biz Sizderdiń kóshbasshylyqtaryńyzǵa úmittenip otyrmyz. Usynystaryńyzdy óte muqııat tyńdalyp jatyr. Meniń oıymsha, ekonomıkalyq seriktestikti budan da myǵym bekite túsip, tehnologııalardy almasý jaǵyn da oılastyrý kerek», - deıdi Pıter Býrıan.

Eýropa Odaǵynyń Ortalyq Azııa boıynsha arnaıy ókiliniń aıtýynsha, Eýropalyq Odaq árdaıym seriktestikke daıyn.

«EO málimdeıdi: Biz aımaqtaǵy (OA - avt.) ártúrli geosaıası oıyndarǵa aralasqymyz kelmeıdi. Biz kerisinshe konstrýktıvti túrde seriktesip, osy aımaqtyń turaqty túrde damýyna, gúldený protsesine úles qosqymyz keledi. Sondyqtan, osy aımaqtaǵy ózge de iri oıynshylardyń bastamasyna, onyń ishinde «Bir beldeý - bir jol» baǵdarlamasyn usynyp otyrǵan Qytaıǵa da qoldaý bildiremiz. Sondaı-aq qazirgi ýaqytta ózara baılanys júıesin ázirlep jatyrmyz», - dedi ol.

Aıta ketsek, Astananyń 20 jyldyǵyna arnalǵan halyqaralyq konferentsııany Elbasy kitaphanasy, QR Syrtqy ister mınıstrligimen, QR Tuńǵysh Prezıdenti - Elbasy Qorymen birlese uıymdastyryp otyr.