PISA reıtıngi: Qazaqstan matematıka men jaratylystaný boıynsha TOP-50 eldiń ishine kirdi
«Qazir ǵana kezekti PISA reıtınginiń nátıjesi jarııalandy. Ózderińiz biletindeı, bul — bilim sapasyn baǵalaıtyn mańyzdy halyqaralyq júıe. Elimiz matematıka jáne jaratylystaný pánderi boıynsha TOP-50 eldiń ishine kirdi. Jaratylystaný pánderinen kórsetkish 26 balǵa artyp, matematıka jáne oqý saýaty boıynsha aldyńǵy nátıjeler saqtaldy. Bul jerde mektepterimizdiń rólin erekshe atap ótken jón. Qala men aýyldyq jerlerdegi oqýshylar arasyndaǵy bilim sapasyndaǵy alshaqtyq azaıyp keledi. Jalpy, 81 eldiń ishinde Qazaqstan matematıkadan 46-oryn (2018 jyly 54), oqýdan — 61-oryn (2018 jyly 69), jaratylystaný páninen — 49-orynda (2018 jyly 69) tur. Memleket basshysynyń bilim berý júıesine úzdiksiz kórsetip kele jatqan jan-jaqty qoldaýynyń arqasynda osyndaı kórsetkishterge qol jetti. Pedagog mártebesin arttyrý, jalaqyny kóbeıtý, qosymsha bilim berýdi, ınfraqurylymdy damytý, balalarymyz úshin qaýipsiz jáne jaıly ortany qamtamasyz etý sharalary bilim sapasyn arttyrýǵa tikeleı áser etedi. Bilim salasyn damytýdaǵy memlekettik ustanymnyń durystyǵy aıqyndaldy. Osy baǵyttaǵy jumysty kúsheıte túsken jón», — dep jazdy mınıstr Facebook paraqshasynda.
Osyǵan baılanysty Oqý-aǵartý mınıstrligi halyqaralyq tájirıbeni eskere otyryp, bilim berý sapasyn odan ári arttyrý úshin 5 negizgi baǵyt boıynsha júıeli jumys júrgizip jatyr.
Atap aıtqanda:
«Bilim berýdegi ózgeristerdiń 1000 kóshbasshysy» kadrlyq rezervin qalyptastyrý jáne menedjmentti nyǵaıtý;
21 ǵasyrdaǵy daǵdylar men quzyretterdi damytý úshin oqý baǵdarlamalaryn jańartý, aýyl mektepterin qoldaý jónindegi keshendi baǵdarlamany iske asyrý;
Daıyndyq tásilderin jetildirý, pedagogterdi qaıta daıarlaý jáne biliktiligin arttyrý;
«Jaıly mektep» ulttyq jobasy sheńberinde jańa mektepter salý, qalǵan bilim oshaqtaryn jańǵyrtý, ınfraqurylymyn damytý;
Sapany baǵalaýdyń ulttyq júıesin transformatsııalaý.
«Bul sharalardyń bári bıyl Úkimet qaýlysymen bekitilgen „Mektepke deıingi, orta, tehnıkalyq jáne kásiptik bilim berýdi damytýdyń 2023-2029 jyldarǵa arnalǵan tujyrymdamasynda“ qamtylǵan. Memlekettik saıasat sheńberinde bilim júıesiniń sapasyn arttyrýǵa baǵyttalǵan osyndaı keshendi jumys qajetti nátıjege qol jetkizýge múmkindik beretinine senimdimin. Balaǵa sapaly bilim men sanaly tárbıe berýde tynymsyz eńbektenip júrgen barsha pedagogterge shyn júrekten alǵys aıtamyn», — dedi ol.