Pırotehnıkany qalaı durys paıdalaný kerek – maman keńesi

ALMATY. QazAqparat- Almatyda jyl saıyn jańa jyldyq mereke kúnderi orta eseppen 11 órt tirkeledi. Onyń jalpy sanynyń 18%-ǵa jýyǵy pırotehnıkalyq buıymdardy durys paıdalanbaý saldarynan bolady. Bul týraly Óńirlik kommýnıkatsııalar qyzmetinde ótken baspasóz máslıhaty barysynda qalalyq Tótenshe jaǵdaılar departamenti memlekettik órtke qarsy baqylaý basqarmasy basshysynyń orynbasary Erbolat Tórtqaraev aıtty, dep habarlaıdy QazAqparat tilshisi.

Spıkerdiń sózinshe, megapolıste sońǵy 5 jylda 56 órt shyqqan, onyń 10-y pırotehnıka saldarynan bolǵan.

«Ótken jylǵy jańa jyldyq mereke kezinde pırotehnıkalyq buıymdarǵa abaısyz qaraý saldarynan medıtsınalyq mekemelerge 39 adam júgindi. Onyń 29-y bala. Aýrýhanaǵa 8 adam jatqyzylǵan, onyń 7-ýi bala», - dedi ol.

Aıtýynsha, qutqarýshylar jappaı adamdar turatyn nysandarda ornatylǵan 72 jańa jyldyq shyrshany esepke aldy. Olardyń órt qaýipsizdigi talaptaryna sáıkestigi tekserilip, aldyn alý sharalaryn kúsheıtý boıynsha usynystar berildi.

Sondaı-aq, jappaı syrǵanaý úshin muz aıdyndary uıymdastyrylatyn 14 nysan nazarǵa alyndy, osy nysandardyń ıelerimen is-sharalar ótkizý kezinde órt qaýipsizdigin qamtamasyz etý qajettigi týraly profılaktıkalyq áńgimeler júrgizildi.

«Almaty qalalyq Polıtsııa departamentimen birlesip «PIROTEHNIKA» jedel-profılaktıkalyq is-sharalar jospary kelisilip, bekitildi, soǵan sáıkes 25 jeltoqsannan bastap zań buzýshylarǵa jedel áreket etý sharalaryn qoldana otyryp, pırotehnıkalyq buıymdar satylatyn oryndarda reıdter uıymdastyrylady»,- dedi spıker.

Erbolat Tórtqaraev Almaty turǵyndary men qonaqtaryna pırotehnıkalyq buıymdardy satyp alý tek arnaıy dúkenderde ǵana júrgizilýi kerektigin, bul rette ónimniń qaptamasynyń myjylǵan nemese deformatsııalanbaýyn qadaǵalaý kerektigin eskertti.

Pırotehnıkalyq buıymdardy saqtaý jáne qoldaný kezinde Erbolat Tórtqaraev kelesi erejelerdi ustanýǵa keńes beredi.

-balalardyń óz betimen raketalar men petardalardy qosýyna jol bermeńiz;

-qaýipti aımaq (50 metr)radıýsynda pırotehnıkany qosýǵa kedergi bolatyn eshteńe joǵyna kóz jetkizińiz;

-pırotehnıkany tutatý kezinde eshqashan qoraptyń ústine eńkeımeńiz;

-fıtıldi tutatý kezinde qol sozym aralyǵyndaı oryn qaldyryńyz;

-ónimdi qatty jel kezinde qospańyz;

-pırotehnıkany eger ol iske qosylmaǵan bolsa, qaıta qosýǵa tyryspańyz;

-raketalar men feıerverkterdi adamdar men janýarlarǵa qaratpańyz, hlopýshkalardy aıaq astyna tastamańyz;

-Feıerverkterdi qosý alańy men turǵyn úılerge deıingi eń az qashyqtyq 50 metr bolýy kerek. Alańda aǵashtar, elektr jelileri jáne basqa da kedergiler bolmaýy kerek, bul otshashýlar baǵytyn ózgerte alady.

Foto ız otkrytyh ıstochnıkov