Pıramıdaǵa shyqqan tájikstandyqtardyń ózderi – Ákimdik jármeńkedegi vıdeoǵa túsinik berdi

ASTANA. QazAqparat – Astana qalalyq ınvestıtsııalar jáne kásipkerlikti damytý basqarmasy basshysynyń orynbasary Maqsat Jańabaev Tájikstan aýyl sharýashylyǵy jármeńkesine qatysty áleýmettik jelide taraǵan vıdeolarǵa pikir bildirdi, dep habarlaıdy QazAqparat tilshisi.

«Shynymen de Tájikstan Respýblıkasynyń mádenı kúnderi aıasynda úlken is-shara uıymdastyryldy. Ol – Tájikstannyń Soǵdy oblysy sharýalarynyń jármeńkesi. 300-deı aýyl sharýashylyǵy taýaryn óndirýshi 1 myń tonnadan astam ónim ákeldi. Iá, atalǵan taýarlardy adamdardyń alyp ketkenin kórdik. Biraq, tájik dostarymyz ol taýarlardy tegin alýǵa bolatynyn aıtqan. Óıtkeni, ónim kúnniń astynda buzylyp ketýi múmkin edi. Ónimder óte sapaly. Búginde Tájikstannan qarbyz jetkizilmeıdi. Óıtkeni, jetkizý óte qymbat. Sondyqtan da adamdar Tájikstannyń tátti qaýyny men qarbyzynyń dámin tatqysy keldi. Ózim de dámin kórdim, óte tátti», - dedi ol Ortalyq kommýnıkatsııalar qyzmetindegi dóńgelek ústel otyrysynda.

Onyń atap ótýinshe, jármeńke óte jaqsy ótken. Tájik aýyl sharýashylyǵy taýarlaryn óndirýshiler 2 kúnde 1 myń tonnadan astam ónimniń bir bóligin satyp, bir bóligin tegin taratty.

«Pıramıdaǵa órmelep shyqqan Tájikstannan kelgen qonaqtardyń ózderi boldy. Olar sol jerden jemis-jıdekti alyp, adamdarǵa tegin taratty. Bizdiń turǵyndar pıramıdaǵa shyqqan joq», - dedi Maqsat Janabaev.

Eske sala keteıik, biz buǵan deıin Tájikstannyń elordadaǵy kórme-jármeńkesi merziminen buryn aıaqtalǵanyn habarlaǵanbyz.