«Pık jumysyn baqylap júrsiz be?» - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 5 mamyr, seısenbi kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

«Egemen Qazaqstan» gazetiniń jazýynsha, 1 mamyr merekesine oraılastyryp Almaty qalasy ákimi apparatynyń «Qoǵamdyq kelisim» KMM Qazaqstan halqy Assambleıasynyń qoldaýymen qalalyqtarǵa erekshe syı tartý etti. Assambleıa tatý bolsa as kóp eken, osylaısha álemdegi eń uzyn laǵman da jasaldy. Almatylyqtar men qala qonaqtaryn eleńdetken erekshe oqıǵa Quddys Qojamıarov atyndaǵy Memlekettik uıǵyr mýzykalyq komedııa teatrynyń saıabaǵynda ótti. Álemdegi eń uzyn laǵmandy sozýǵa besaspap aspazdar shaqyrylǵan. 30 birdeı aspaz uıǵyrlardyń dástúrli laǵman daıyndaý ádisimen salmaǵy 687 kılogramm bolatyn dámdi asty daıyndap, jınalǵan jurtqa dám tatqyzdy. «Aspazdar aldyn ala kemi 1500 kisige laǵman daıyndaıtyndaryn jarııalaǵan bolatyn. Degenmen, merekede adam basyn sanap otyrǵan eshkim joq, biraq jer betindegi eń uzyn laǵmandy jeýge kelgender sany jetkilikti boldy»,-dep jazady basylym «Álemdegi eń uzyn laǵman» atty maqalasynda.

Bas bysylymda «KEGOC» aktsıonerleri 40 myńnan asty» degen maqala berilgen. Esterińizge sala ketetin bolsaq, 2014 jylǵy 18 jeltoqsanda «Samuryq-Qazyna» ulttyq ál-aýqat qory» aktsıonerlik qoǵamynyń enshiles jáne baǵynysty uıymdarynyń aktsııalar paketin Qazaqstan Respýblıkasy Úkimetiniń 2011 jylǵy 8 qyr­kúıektegi №1027 qaýlysymen bekitilgen baǵaly qaǵazdar naryǵyna shyǵarý baǵdarlamasyn («Halyqtyq IPO» baǵdarlamasy) iske asyrý sheńberinde «KEGOC» AQ kompanııanyń jaı aktsııalaryn oǵan jazylý jolymen qazaqstandyq qor naryǵyna alǵashqy ornalastyrýdy is júzine asyrdy. Baǵaly qaǵazdardyń uıymdastyrylǵan naryǵynda «KEGOC» AQ-tyń ornalastyrylǵan jaı aktsııalarynyń sany - 25 999 999 (jıyrma bes mıllıon toǵyz júz toqsan toǵyz myń toǵyz júz toqsan toǵyz) dana. «KEGOC» AQ-tyń bir jaı aktsııasynyń ornalastyrý baǵasy 505 (bes júz bes) teńgege baǵalandy.

- Sonyń nátıjesinde 13 mlrd. teńgeden astam mólsherde qara­jat tartyldy. 40 myńnan astam qazaqstandyqtar «KEGOC» aktsııalaryn ıelenýge múmkindik aldy, - dedi «KEGOC» AQ basqar­masynyń tóraǵasy Baqytjan Qajıev

***

«Aıqyn» gazetiniń jazýynsha, Shyny kerek, qalada páteri bar jurttyń basym bóligi Páter ıeleri kooperatıvteriniń (PIK-terdiń) qyzmeti úshin tólenetin tólemniń qandaı maqsatta jumsalyp jatqanynan beıhabar.

Sebebi onyń anyq-qanyǵyn bilý úshin PIK keńsesine barmaıdy, ol turmaq PIK tóraǵasynyń aýlamyzǵa kelip ótkizetin jıyndaryna da qatyspaıtynymyz ras. Endi ondaı jıyndarǵa barýdyń da qajeti bolmaıtyn sekildi, óıtkeni jýyrda elimizdiń úsh birdeı qalasynda PIK-terge jumystary jóninde ınternet-resýrsy arqyly esep berýdi mindetteıtin pılotty joba iske qosylmaq. Bul týraly Ortalyq kommýnıkatsııalar qyzmetindegi brıfıngte Ulttyq ekonomıka vıtse-mınıstri Qaıyrbek Óskenbaev habarlady.

«Biz - páter ıeleri retinde PIK-terdiń keńsesine bas suǵa bermeımiz. Jumysbasty bolǵandyqtan, ol úshin ýaqyt bólgimiz kelmeıdi. Sondyqtan PIK-terdiń bizden jınap alǵan aqshany qandaı maqsatta jumsap otyrǵany belgisiz kúıi qalyp qoıady. Endi PIK jumysyn qadaǵalaý úshin keńsesine barýdyń qajeti bolmaıdy. Biz aldaǵy ýaqytta Astana, Qyzylorda jáne Aqtaý qalalarynda PIK-terge aı, toqsan saıyn elektrondy formatta esep berýdi engizip otyrmyz. Bul jobaǵa sáıkes, turǵyndar óz PIK-teriniń saıtynan barlyq aq­paratqa qanyǵyp otyrady» deıdi Q.Óskenbaev. Bul jaıynda «Pık jumysyn baqylap júrsiz be?» atty maqalada tolyq jazylǵan.

Osy basylymda «Alypsatardyń qyzmetine shekteý qoıylǵany jón» degen maqala jarııalandy. Qazaqstan elge avtokólik tasymaldaýdy tek resmı dılerler arqyly júzege asyrýdy oılastyrýda. Bul týraly 2015 jyldyń aqpan aıynyń basynda Májilistegi jalpy otyrystyń syrtynda BAQ ókilderine máseleni túsindirgen Investıtsııalar jáne damý mınıstriniń orynbasary Albert Raý málimdegen-di. «Eýrazııalyq ekonomıkalyq odaqqa (EAEO) múshe memleketter aýmaǵynda avtokólikterdi jetkizýdi tek resmı dılerler arqyly júzege asyrý máselesi qarastyrylýda. Mysaly, Toıotanyń resmı dıleri - «Astana Motors» kompanııasy. Biraq Toıota Qazaqstanǵa «Astana Motorstyń» qatysýynsyz avtokólik ákelýde. Surqaı dılerler degenimiz osylar. Biz bul máseleni reseılik áriptesterimizben ashyq talqylap, belgili bir túsinistikke qol jetkizdik», - dedi sol joly Albert Raý. Onyń pikirinshe, mundaı qadam EAEO-daǵy avtokólikter baǵasyn bir-birine sáıkestendirýge múmkindik beredi.

Qazirgi tańda Qazaqstanda bekitilgen normalar men standarttarǵa sáıkes kelmeıtin avtokólikter Reseıden jáne t.b. elderden kóptep tasymaldanyp jatyr. Mysaly, «LS» jýrnaly habarlaǵandaı, 2015 jyldyń eki aıynda surqaı dılerler arqyly elimizge 74 myń avtokólik ákelingen. «Azııa Avto» AQ-tyń prezıdenti Erik Saǵymbaevtyń paıymdaýynsha, Qazaqstandaǵy avtodılerlerdi lıtsenzııalaý otandyq avtokólik naryǵyn kóleńkedegi bızneske ketýge jol bermeıdi.

***

«Ekspress-K» gazetiniń búgingi sanynda «Vbıt flag v serdtse Berlına» degen maqala berilgen. Keshe Almatyda «Almaty» qonaq úıiniń qabyrǵasyna Uly Otan soǵysynda Reıhstagqa tý tikken dańqty qazaq batyry, Raqymjan Qoshqarbaevqa arnalǵan eskertkish taqta ornatyldy.

Leıtenant Raqymjan Qoshqarbaev pen qatardaǵy jaýynger Grıgorıı Býlatov fashıster uıasynyń keńsesine jetip, Jeńis týyn Reıhstagtyń birinshi qabatyna tigedi. Osy erligi úshin 150-shi dıvızııa basshylyǵy Raqymjan Qoshqarbaevty Keńes Odaǵynyń Batyry ataǵyna usynady. Alaıda sol kezdegi ádiletsizdiktiń saldarynan oǵan Qyzyl Tý ordeni ǵana beriledi. Kózi tirisinde de «Almaty» qonaq úıiniń dırektory bolyp qyzmet atqarǵan ardagerdi týystastary men kózi kórgender de óte qarapaıym, adamgershiligi mol, sypaıy jan retinde eske alady.