PIK-tiń ornyna MMIB: Kópqabatty turǵyn úılerdi basqarýdaǵy jańa erejeniń ereksheligi nede

ASTANA. QazAqparat - QR Investıtsııalar jáne damý mınıstrligi kópqabatty turǵyn úılerdi basqarýda Páter ıeleri kooperatıviniń (PIK) mindettemelerin shektep, onyń ornyna Múliktiń menshik ıeleri birlestigin (MMIB) qurýdy usynyp otyr. Endeshe, jıi daý-sharǵa iligetin kópqabatty turǵyn úılerde qordalanǵan máselelerdi jańa zań jobasy qalaı sheshetin bolady? Bul suraqqa resmı saýal joldaǵanymyzda QR Investıtsııalar jáne damý mınıstriniń orynbasary Qaıyrbek Óskenbaev jaýap berdi.

Aıta ketsek, buǵan deıin mınıstrliktiń «QazAqparat» halyqaralyq aqparat agentigine bergen resmı jaýabynda QR IDM vıtse-mınıstri Qaıyrbek Óskenbaev kópqabatty turǵyn úılerdi basqarýǵa jaýapty PIK azamattardyń senimsizdigin týdyryp otyrǵanyn habarlaǵan bolatyn. Osy sebepti, atalmysh mınıstrlik Úkimettiń qaraýyna turǵyn úı-kommýnaldyq sharýashylyǵy máseleleri boıynsha jańa zań jobasyn usynyp otyr. Naqtyraq aıtqanda, QR IDM kommertsııalyq emes uıymnyń jańa nysany - «múliktiń menshik ıeleri birlestigin» (budan ári - MMIB) «bir úı - bir MMIB - bir shot» qaǵıdaty boıynsha qurýdy usynýda. Zań jobasy negizindegi usynystardyń bárin myna siltemeden kórýge bolady.
Al MMIB júıesiniń PIK-ten aıyrmashylyǵy qandaı bolady? Bul jaıly QR IDM vıtse-mınıstri Qaıyrbek Óskenbaev bylaı dep jaýap beredi.

«Turǵyn úı-kommýnaldyq sharýashylyǵy máseleleri boıynsha zań jobasyna kóp páterli turǵyn úıde kommertsııalyq emes uıymnyń jańa nysany MMIB qurý kózdelgen.Atap aıtqanda, usynylyp otyrǵan qaǵıdat árbir úıdi basqarý boıynsha jeke tásildi qarastyrady. Árbir MMIB-tiń óziniń jeke aǵymdaǵy jáne jınaqtaý shottary ashylatyn bolady. Tirkelgen kondomınıým obektileriniń sanynyń kóbeıýine, servıstik kompanııalardyń damýy úshin alǵysharttar qurylady», - deıdi Qaıyrbek Óskenbaev.

Vıtse-mınıstrdiń aıtýynsha, PIK-ter óz jumystaryn múliktiń menshik ıeleri birlestigimen nemese turǵyndarmen jasasqan kelisimshart negizinde basqarýshy nemese servıstik kompanııalar retinde jalǵastyratyn bolady.

«Zań jobasy boıynsha Ǵylymı-quqyqtyq jáne ǵylymı-ekonomıkalyq, lıngvıstıkalyq saraptamynyń, zańdy tulǵalar birlestikteriniń jáne «Atameken» Ulttyq kásipkerler palatasynyń oń qorytyndylary alyndy. Qazirgi ýaqytta zań jobasy múddeli memlekettik organdarmen kelisýden ótti jáne kestege sáıkes Qazaqstan Respýblıkasynyń Úkimetine jiberildi», - deıdi vıtse-mınıstr.

Vıtse-mınıstrdiń jaýabyna sáıkes, joǵaryda kórsetilgen usynystardy engizý kondomınıým obektisin basqarýǵa jáne kútip ustaýǵa qatysatyn sýbektilerdiń qarym-qatynasyn jaqsartýǵa múmkindik beredi. Sondaı-aq, Qaıyrbek Óskenbaev kondomınıým obektisin basqarýǵa jáne kútip ustaýǵa qarajatty jumsaýdyń ashyqtyǵyn arttyrýǵa jáne MMIB men servıstik kompanııalardyń kórsetilgen qyzmetter sapasyna úı jaılar (páterler) ıeleriniń qanaǵattanýyna yqpalyn tıgizetinin habarlaıdy.