PIK-ten MIB-ke ótý: Astanada úı qujattaryn berýde kedergiler jasalady

NUR-SULTAN. QazAqparat – Elorda turǵyndarynan kún saıyn menshik ıeleri birlestigi qyzmetine qatysty 7-10 usynys kelip túsedi. Bul týraly Nur-Sultan qalasy Múlik ıeleri birlestigi ortalyǵynyń basshysy Gúlvıra Ábetova málim etti, dep habarlaıdy QazAqparat tilshisi.

«2022 jyl bastalǵaly qalalyq Múlik ıeleri birlestigi ortalyǵyna 7 myńna astam túrli ótinish, saýal kelip tústi. Sonymen qatar osy ýaqytqa deıin turǵyndardan múlik ıeleri birlestiginiń (MIB) qyzmetine qatysty 1700 usynys qabyldandy. Elordada Múlik ıeleri birlestiginiń ortalyǵy Respýblıka dańǵyly, 32 mekenjaıynda ornalasqan. Kún saıyn ortalyqqa MIB-ke qatysty bastamashyl turǵyndardan 7-10 usynys túsedi. Keıbir turǵyndar MIB-ke ótý úshin ne kerek, qandaı qujattar qajet dep surap jatady», - dedi Gúlvıra Ábetova qala ákimdiginde ótken baspasóz máslıhatynda.

Onyń aıtýynsha, atalǵan ortalyqtyń mamandary menshik ıeleri birlestigi qyzmetine qatysty turǵyndardyń barlyq saýalyna jaýap beredi.

Sondaı-aq ortalyq basshysy elordada MIB júıesine ótý boıynsha kedergilerdiń de baryn jasyrmady.

«Ortalyqqa kelip jatqan ótinishterdiń arasynda shaǵym da bar. Aıtar bolsaq, turǵyn úılerdi basqarǵan buǵan deıingi organdar qarjyǵa qatysty qujattardy MIB-ke bergisi kelmeıdi..., úı qujattaryn berýde kedergi jasaıdy. Sonymen qatar aldyńǵy basqarý organdary zańsyz saýalnama júrgizetinine, qarajat jınaıtynyna qatysty shaǵymdar bar. Eske sala ketsek, 2020 jyldan bastap basqarý organy – úı keńesi bolyp sanalady, ıaǵnı kez kelgen qujattar úı keńesi arqyly rastalýy kerek», - deıdi ákimdik ókili.