Pıar aktsııaǵa qomaqty qarjy bólgen «Turǵynúıqurylysjınaqbanki» tekseriledi

NUR-SULTAN. QazAqparat - «Turǵynúıqurylysjınaqbankiniń» elimizdiń óńirlerinde pıar sharalar ótkizýge qomaqty qarjy bólýiniń zańdylyǵy tekseriledi. Bul týraly QR Qarjy mınıstrligi Memlekettik satyp alýlar zańnamasy departamentiniń dırektory Sábıt Ahmetov aıtty, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhatynda BAQ ókilderi Sábıt Ahmetovten: «20 shildede «Turǵynúıqurylysjınaqbanki» óńirlerde pıar sharalar ótkizý úshin shamamen 15 mln teńgege jetkizýshilerden ótinim qabyldaýdy bastady. Degenmen, Memleket basshysy mundaı sharalarǵa moratorıı engizýdi tapsyrǵan edi. Sondyqtan bul qanshalyqty durys?», - dep suraǵan edi.

Osy oraıda departament dırektory bul saýalǵa jaýaby joq ekendigin jasyrmaı, aldaǵy ýaqytta tekserý júrgizip, nátıjesin jarııalaýǵa ýáde berdi.

»Ortalyq kommýnıkatsııalar qyzmetinde sóz sóıler aldynda bul saýaldy alǵan edim. Dál qazir oǵan meniń esh jaýabym joq. Degenmen, biz bul jaǵdaıdy qarastyrýǵa daıynbyz jáne tekserý nátıjeleri týraly habarlaıtyn bolamyz«, - dedi ol.